No need to explain
Morag wa nay kapuslanan nako ang akong kinabuhi. Pulos na lang gyud kaguol ang akong gibati. Kanunay moduaw si Norma nako. Gusto ko niyang lingawon apan wa koy ganang moatubang niya. Gusto kong mag-inusara.
Ug kanunay kong magdanguyngoy sa sulod sa akong kuwarto. Wa na koy ganang moeskuwela. Wa na sa akong hunahuna ang akong future. Ang kalagot ug kaguol ang nia sa akong kasingkasing. Nasuko ko kang Roman. Naguol ko sa nahitabo sa akong lovelife.
Labaw kong gikalagotan ang paglimbong ug pagtunto ni Roman nako.
Usa ka hapon, adlaw nga Domingo, misimba ko. Gidangop ko sa Diyos ang mga frustrations nga miabot sa akong kinabuhi. Ug sa atubangan sa Ginoo, gipasaylo ko si Roman. Di ko makahimo nga magbaton kog pagdumot niya. Tingali, tungod sa dako kong gugma niya, nakahimo ko sa pagpasaylo sa iyang pagluib nako.
Hapit na mahuman ang Santos nga Misa dihang dunay mikupot sa akong kamot. Wa man gud koy lingi-lingi kon kinsa ang akong gikatupad sa sulod sa simbahan. Ang akong hunahuna natingob ngadto sa pari nga nagwali.
Nakalitan ko sa akong paglingi.
“Roman?”
Mikibot ang akong mga ngabil. Ug daw hagawhaw lang ang pagkalitok ko sa ngalan ni Roman, nga nag-smile nako. Gikulbaan ko.
Pagkahuman sa Misa, miubay paglakaw si Roman nako. “Can I invite you for a dinner?” Diha na mi sa gawas sa simbahan. Mihunong kog lakaw. Seryuso kong miatubang kang Roman nga nagpadayon sa pagpahiyom nako. Milingi-lingi ko. Gipangita ko si Renren nga akong gituhoan nga kauban ni Roman karon. Apan wa ko makita si Renren. Dako ang kong pagtuo nga nakasal na sila si Roman ug si Renren.
“Para sa unsa pa, Roman? Ayaw pun-i ang gibati kong kaguol.” Kahilakon ko. “Basig makakita si Renren nato.”
“Nagpalayo na si Renren, Grace. Nakasabot siya nga way kapuslanan kon magpakasal kami kay wa koy love niya. Kagustohan sa tagsa-tagsa namo ka parents nga minyuon kami kay suod silang managhigala. Pero nakasabot sila nako.”
Nakagakos ko sa gitug-an ni Roman nako.
“Ikaw ang akong love, Grace.” Hugot kaayo ang akong paggakos sa akong boyfriend. Ug hibatyagan ko ang dakong pagmahal ni Roman tungod sa kahugot sab sa iyang paggakos nako. (KATAPUSAN)