NLEX, NORTHPORT MAGTINAKTAKAY
Duwa karon
7:00 pm- NLEX batok NorthPort
Magtinagakay karong gabii ang No.1 team NLEX Road Warriors ug No. 8 NorthPort Batang Pier aron ilugan ang katapusang luna sa semi-finals sa Philippine Basketball Association (PBA) Governor’s Cup sa Smart Araneta Coliseum.
Ang modaog ning sangkaa maoy makaangkon sa katungod sa pagpakigbatok sa Brgy. Ginebra Gin Kings alang sa semi-final best-of-five series.
Ning sangkaa, dili ikalimod nga ningtapon na sa habig sa Batang Pier ang momentum human nila gipanglampaso ang Road Warriors, 115-90, niadtong Lunes, Nobiyembre 25 sa quarter-finals.
Ang kadaugan maoy nakapapha sa twice-to-beat nga benepisyo nga bawon sa Road Warriors sa quarter-finals isip insentibo sa ilang pagkahimong No.1 team.
Ning maong panagparang, ningbali na gyud ang dagan sa hangin ug dako na ang pabor sa Batang Pier.
Kini gumikan kay posibleng mokombati ang Road Warriors nga wala ang duha sa ilang mga kasandigan nga sila si Poy Erram ug Paul Varilla.
Ang duha ka mga magduduwa gituohang mapahamtangan og usa ka duwa nga suspensyon gumikan sa ilang pagkahilambigit sa kasamok nga nahitabo niadtong Lunes.
Si Commissioner Willie Marcial mihatag og kamanduan nga patungahon sila si Erram ug Varilla sa iyang opisina sa dili pa magsugod ang tinagakay nga duwa.
Nagdepende na sa desisyon ni Marcial kon iyang ipatuman ang suspensyon nila ni Erram ug Varilla
karong gabii o sa sunod na nga duwa sa Road Warriors.
Naa o wala sila si Erram ug Varilla, ang Road Warriors andam mosagubang sa seguradong malisod nga tahas nilang masugatan batok sa Batang Pier ning maong krusyal nga kombati.
“That’s something out of our hands, something out of our control,” asoy sa usa sa labing sinaligan sa Road Warriors nga si Kiefer Ravena.. “We just have to make sure of the things that we have right now. So far kumpleto pa naman.”/