VENDORS MAKABALIK SA COLON
UBANG MGA DAPIT SA CEBU CITY MATAG SABADO, DOMINGGO RA
Mga 300 ka sidewalk vendors sa Siyudad sa Sugbo makabalik na sa ilang naandang puwesto sa matag Sabado ug Dominggo.
Makabaligya usab sila sa night market gikan sa Lunes ngadto sa Biyernes sa tipik sa dan Colon sugod sa Disyembre 1 ngadto sa Enero 30, 2019.
Ang night market molanat og walo ka mga oras, sugod sa alas 6 sa gabii hangtod sa alas 2 sa kaadlawon.
Mga manindahay duna nay tulo nga kapilian- makabaligya sila sa night market atol sa weekdays, makabalik sila sa ilang naandan nga dapit nga tindahan sa mga Sabado ug Dominggo ug makabaligya usab sila sa
relocation site sa Tabo sa Banay. Sa schedule sa ilang pagpaninda sa Sabado ug Dominggo, matod ni Cebu City United Vendors Association (CCUVA) president Maria Pino nga ila pa kining i-finalize ang schedule.
Si Cebu City Mayor Edgardo Labella nipahibawo niini atubangan sa sidewalk vendors sa Huwebes, Nobiyembre 28, nga napahawa atol sa road clearing operations human sa mando ni Presidente Rodrigo Duterte.
Si Labella nihulagway sa usa ka buwan diin ang sidewalk vendors makapamaligyag
usab sa sidewalk isip “probationary period.”
Gipasabot ni Labella ang vendors nga mao lang kini ang lakang nga ilang mapatuman, samtang sila nangita pag long term nga solution aron matubag ang problema sa napahawa nga vendors.
Sa mga Sabado ug Dominggo, ang vendors makapamaligya sa sidewalks sa Colon, Osmeña blvd., N. Bacalso ave. ug Kaoshiung st. duol sa SM City Cebu.
Mga vendor kihanglan motuman sa two feet by two feet nga gitagana alang kanila base sa
rules and regulations nga gipatuman sa Prevention, Restoration, Order, Beautification, and
Enhancement (Probe) team.
Gikinahanglan nga ang vendors mo-manage sa ilang stalls ug gidid-an sila sa pagdala og menor. Gidili usab ang paggamit og liquefied petroleum gas o butane. Laing gidili mao ang dagkong mga payong o tolda, paggamit sa sobra sa usa ka cool box ug paggamit og folding beds o banig sa ilang pag-display sa baligya.
Gisultihan usab ni Labella ang vendors nga kinahanglan di sila makababag sa mga nangagi sa ilang pagpamaligya sa sidewalk aron ang nasudnong kagamhanan mouyon sa set up.
“Kinahanglan magbaton og disiplina,” sulti ni Labella sa vendors. /