Soro-soro nga midat-ug, mipatay sa dalagita taw-an?

Di pa gihapon makatuo si Nestor Baguio nga sa usa lang ka pamilok namatay ang iyang kinamanghurang anak nga si Jechel Ann niadtong Lunes sa gabii, Nobiyembre 25, 2019.

Si Jechel Ann natumbahan sa usa ka punoan sa “soro-soro” sa Zone Pansat 2 Brgy Kalawisan, Lapu-Lapu City samtang naglingkod sa lantay sa balay sa iyang bayaw nga nahimutang ilawom sa mao nga punoan dihang nahitabo ang insidente.

Apan ang mas nakapatingala ni Nestor mao usab ang tabi-tabi sa mga silingang nakakita sa insidente nga adunay kaubang laing bata ang iyang anak atol sa hitabo nga daw sa maoy iyang giluwas nga di matumbahan sa natumbang kahoy.

Gibutyag niya nga atol sa hitabo, duha ka ambulansya ang ilang gitawag gumikan kay duha ka bata ang nakit-ang natumbahan sa punoan apan, dihang naugkat na ang iyang anak, bugtong si Jechel Ann ra ang nadat-ogan sa kahoy.

Dako ang pagtuo ni Nestor nga ang batang giingong nakit-an sa ilang mga silingan nga kauban sa iyang anak atol sa hitabo usa ka di ingon nato.

Kini gumikan kay ang naasoyng punoan sa “soro-soro” nga nagbarog na sulod sa 60 ka tuig dugay na nga nadungog nga taw-an.

“Pagkuha lage niya mura siyag adunay gigakos. Pero siya ra man gyud usa pagkuha sa mga rescuer. Mahay gyud kay amo pa gani unta to gisugo kay nag-utan mi atong gabhiona unta,” matod ni Nestor.

Si Lendel Guipo nga bayaw sa biktima misaysay nga nanan-aw unta sila og basketball niadtong Lunes sa gabii dihang nakigadto si Jechel Ann sa ilang pinuyanan aron moinom og tubig.

Dihang nagkuha siya ug tubig sa sulod sa ilang balay, mas gipili sa dalagita nga sa lantay ilawom sa soro-soro maghulat.

Sunod lang niyang nakita mao ang kalit nga pagkatumba sa kahoy. Dugang ni Guipo nga sa iyang pagtuo, gi-tripan si Jechel Ann sa di ingon nato sanglit kanunay na nga magtambay sa lantay ilawom sa naasoyng punoan sukad pa kaniadto.

NAWALA SAB?

Nianang gabhiona usab adunay silingan nilang bata ang nawala apan giingong giuli human gitambolan sa mga silingan busa dako ang iyang pagtuo nga si Jechel Ann ang napiliang kuhaon sa di ingon nato nga hulip sa batang giuli.

Iya usab gikompirmar nga dugay na usab siya makadungog og estorya nga adunay mga “duwendi” nga makit-ang maglingkod lingkod sa lantay ilawom sa punoan sa soro-soro apan, wa lang niya panumbalinga.

“Mura gani’g puli siya atong nawala (nga bata) unya nakit-an ra, as in wala gyud diritso ra ang pagkatumba. Sa paggawas nako sa amoa unya sa wala pa to ang dahon nangahulog,” saysay ni Guipo mahitungod sa hitabo.