Problemang dugay na

Human dayga ang Cebu City Government ubos ni Mayor Edgardo Labella tungod sa iyang paghawan sa dan Colon, posibleng sawayon na sab siya human mahukmi nga pabalikon ang vendors sa mga sidewalk diin sila nahimutang. Nangaanad ra ba ang publiko sa hawan na nga dan Colon ug Osmeña blvd. kay wa nay vendors nga makababag sa paglakaw sa mga pedestrian.

Tubag na kini sa administrasyong Labella sa mga yangongo sa vendors nga makabalik sila sa ilang mga pwesto, labina sa dan Colon kay sila nag-antos sa epekto sa clearing operations. Nawad-an og panginabuhi o natibhangan og dako ang ilang kita nga maoy tinubdan sa ilang inadlaw nga pangunsumo.

Malipay na tingali sila aning bisan kaduha lang sa matag semana sila tugtang makapaninda. Kining mga adlawa, busy usab ang downtown kay maoy tingpamalit.

Apan kutob na lang ba diha ang Siyudad? Di na lang ba sila mangitag paagi nga masulbad ang pag-antos sa vendors samtang di sila makadisturbo sa publiko ug sa mga magpapatigayon sa mao nga mga dapit? Gikinahanglan sa Siyudad ang midterm ug long term nga solusyon sa paghawan sa mga sidewalk nga di usab makulban sa panginabuhi ang vendors. Kon nahimo sa ubang mga dapit sa Pilipinas, nganong di man sa Sugbo?

Dinhi, ang Siyudad makapangayog panabang sa business community ug akademiya alang sa pagpahigayon og pagtuon unsaon pagsulbad ang problema. Kay kining problema sa sidewalk vending di lang problema sa Siyudad, kon di sa tanang mga sakop sa komunidad.

Kini nga problema wa mamugnag usa ka gabii, kon di dugay na. Nahitabo kini tungod kay napasagdang modako ang problema sa nanglabay nga katuigan.

Hinaut pang di lang dinhi mohunong ang Siyudad sa pagpangitag solusyon, di maghuna-huna nga nag-inusara kay gikinahanglan ang partisipasyon sa ubang sektor.