‘Nagpaulan’ og mga premyo
Di ko magpakaaron ingnon nga wa ko ma-disappointed sa mga organizers sa Southeast Asian Games nga pormal nang ablihan ugma. Syempre, Pinoy god ko mao nga apil sab ko sa manlipaghong kon may madungog o mabasahan nga kapalpakan.
Kay magsugod na man ang mga dula, ako unang ipadaplin ang negatibong sentimento ug ibalhin ang panan-aw sa performance sa atong mga atleta.
Nakadayeg ko sa pagpili sa mga Pinay beauty queens nga muse sa lainlaing mga nasud nga apil sa dula. Basin na lang matabunan sa kagwapa sa mga Pinay bisan gamay lang ang mga kapalpakan.
Gipakita ni Ms. Universe-Philippines 2019 Gazini Ganados ang iyang dakong pagtoo sa Balaang Bata ug sa ikatabang niini sa iyang paningkamot nga makalangkat og laing Ms. U crown sa Dis. 9.
Manghinaut ko nga magmalampuson si Gazini. Dako kining dungog di lang sa nasud lakip ug labaw na sa mga taga Cebu.
Gipahibalo ni promo diva Josie Pereyra nga moanhi sa Cebu si Vice Ganda sa Dis. 15 aron pagpagarpar sa iyang pelikula alang sa 2019 Metro Manila Film Festival nga The Mall, The Merrier.
Kauban ni Vice ning maong pelikula si Anne Curtis. Wa hinoon mosulti si Ms. Pereyra kon makakuyog ba si Anne sa pagbisita sa Cebu labina kay buntis kini sa una nilang liwat ni Erwan Heussaff.
Hinimo sa Star Cinema, isalida ang The Mall, The Merrier sugod sa Dis. 25.
‘Magpaulan og mga premyo’ ang pasiuna sa tinugyanan sa Globe Telecom sa pagpahibalo sa mga taga media bahin 2019 Christmas party.
Ug tuod man, mga groceries, mobile wifi, home wifi, telebisyon, laptops, cellphones ug salaping Pilipinhon (P20k ug P30k) ang ‘gipaulan’ sa kompaniya sa telekomunikasyon niadtong Martes, Nob. 26, didto sa Seda Hotel.
P30k, P50k ug P70k usab ang mga ganti sa cheerdance presentation diin ang Red Team nga gilangkuban sa mga taga SunStar ang nidaug.
Mga taga radyo ang kadaghanan sa nidaug sa mga dagkong premyo sa raffles. Kape ug kagamitan sa pag-andam niini ang giapod-apod sa tanang nitambong.
Daghang salamat, Globe Telecom! Malipayong Pasko ug bulahang bag-ong tuig!