Char char lang

Dear Papa Joe,

Palihug tambagi ko sa akong problema. Ako diay si Jenny, taga Marigondon. Usa ko naminyo aning akong bana, naa koy duha ka mga anak sa pagkadalaga ug duha sa akong bana karon. Wala ra koy problema sa akong bana sa financial, pagmahal, tanan gasto sa balay iyaha. Nagtrabaho ko pero akoa ra ang akong sweldo.

Mao ni ang akong problema. Naa man gud koy ka char char, Papa Joe, ulitawo, 28 ang edad. Sa pag-una, wala ra koy pagbati niya pero nadugay nadutlan ko bisan two months pa mi. Mao ni akong problema kay maora man kog na inlove pero, wala ko maghunahuna nga ilisan niya ang akong bana kay dili parehas niya ang akong ideal man. Ang ako hinuong bana mao jud na ang akong ideal man sa pamorma, Papa Joe.

Karon gusto ko mogawas sa sitwasyon kay nakabalo ko nga sayop pero, sakitan na man ko, Papa Joe. Unsa man ang akong angay buhaton nga guilty man ko pirme sa akong gibuhat, labina kay ang akong bana wala magbinuang nako? Pinangga pa kaayo ko. Unsay akong buhaton?

JENNY

Jenny,

Likay kutob sa imong mahimo, walay padulngang maayo na imong gisudlan. Daghang mapagan anang imong kalaki, labaw na ang imong mga anak. Labi na lahi lahi na sila og amahan. Unsa nalay masulti sa imong mga ginikanan, samot nang katawhan nga maora ba ka og walay katagbawan.

Ayaw pagdahum nga tarungon ka sa imong ka char char, nga klaro ra char char ra sad iya nimo. Tambal sa iyang pagka iro. Day, swerte na gani ka kay naay nagmahal nimo. Iya pang nadawat ang imong kagahapon unya abusaran pa nimo. Pag ampo sa Ginuo, Day, nga lamdagan ka, kuhaon nang di maayong pagbati nimo sa imong ka char char. Huna-hunaa imong mga anak. Daghang salamat.

PAPA JOE