2 PATAY, 17 ANGOL SA PAGBUTO SA GRANADA

Usa ka 65 anyos nga lalakeng naghuramentado ug pulis nga nisuway pagdisarma kaniya nangamatay human nibuto ang granada nga dala sa tiguwang sulod sa Initao College sa Jampason, Initao, Misamis Oriental, Huwebes, Nobiyembre 28, 2019.

Moabot og 17 ka mga tawo, lakip na sa mga pulis ug pipila ka mga tinun-an, nangaangol.

Ang pulis giilang si Master Sergeant Jason Magno sa Initao

town police, usa mga pulis nga ningsuway pagdis-arma kang Ebrahim Ampaso, lumolupyo sa Madamba, Lanao del Sur.

Ang panaglayog nakuhaan og video sa usa ka netizen.

Mga imbestigador nagkanayon nga si Ampaso daan nang nagdala og granada dihang ang iyang sakyanan nga gikargahan og lumber gipara sa personnel sa Department of Environment and Natural Resources (DENR).

Ang DENR office mga 500 ngadto sa 800 metros ang gilay-on gikan sa community college. Ang tunghaan way koral, matod sa kapulisan.

Ang DENR personnel nanagan ngadto sa tunghaan human si Ampaso nag-wild na sud sa buhatan sa DENR.

“Sa office pa lang ng DENR nag amok na siya kaya yung mga personnel ng DENR tumakbo sa covered court at sumunod ang suspect,” matod ni Captain Princess Velarde, tigpamaba sa Misamis Oriental

Provincial Police Office.

Sila si Magno ug iyang team niresponde sa dapit ug nisuway sa pagpakalma sa suspek. Sila si Magno ug suspek puro nagkupot sa granada dihang kini nibuto.

Si Police Master Sergeant Alice Balido naangol. Sa usa ka pamahayag, si Misamis Oriental Governor Yevgeny Vincente “Bambi” Emano niingon nga ang provincial government moabag sa mga biktima sa pagbuto. / Sunstar Philippines