Tag-iya sa iro nga gitigbas di mokiha sa silingan kay nagpangikog, Pasko na sab

Unom ka mga buwan nga pagkapriso ang posibleng atubangon sa hubog nga nitigbas sa ulo sa iro niadtong Sabado.

Kana kon ikiha ug mamatud-ang sad-an ang lalakeng nitigbas sa iro sa ilang silingan.

Apan ang tag-iya nagpangikog na sa pagkiha kay gawas nga sila silingan, Pasko na usab.

Nag-atubang na sa Mantuyong Barangay Hall sa Dakbayan sa Mandaue sila si Jessie Tan, kinsa maoy nanigbas ug si Laziel Perez, tag-iya sa “aspin” nga iro nga si KJ, kansang nakaangkon og dakong gisi sa walang bahin sa ulo. Nangayo og pasaylo si Tan kang Perez atol sa panagtagbo sa barangay hall.

Si Perez niingon nga di lang siya ganahan mopasaka og kaso batok kang Tan tungod kay silingan sila ug permanente silang magkita.

“Ako atras lang ko sa pagkaso kay bisan unsaon, silingan baya mi magkita ug magkita baya mi. Nya. Pasko na pud so, bati kaayo nga naa tay hatred sa atong silangan,” sigon ni Perez.

Sa bahin ni Tan, nakalitan siya pagkakita niya nga gigukod ug gipaghot sa iro ang iyang anak nga 4-anyos hinungdan nga niadtong nakakita siya sa guna nga naa sa kaang duol niya, iya kining gihapak.

Apan alang kang Annalyn Aizpuru, presidente sa Island Rescue Organization (IRO), nga ang maong hitabo di igong rason nga dapatan ang iro.

Gani ang kinahanglan nga buhaton ni Tan niini mao ang pagreklamo sa barangay nga ang iro ni Perez nakapeligro sa iyang anak kon diin si Perez unta ang makadawat sa penalty.

Dugang ni Aizpuru nga posibleng mapriso si Tan og unom ka buwan tungod sa gibugaton sa iyang gibuhat apan i-review pa kining maong kaso ngadto sa board of directors ug

officers aron maduso. “Kung may complain kayo sa neighbors nyo, diretso kayo sa barangay. Wag kayo ang mag-sentence sa iro, inyong pasakitan kay gipaghot kayo,” sigon sab ni Aizpuro.

Tungod sa maong panghitabo, si konsehal Rizza Ramos, kagawad sa barangay, niingon nga pahugtan nila ang pag-implementar sa ilang information

dissemination sa ilang barangay aron di na mausab.

Naghinaot sab si Ramos nga mamahimo kining leksyon sa mga lumolupyo sa ilang barangay.