HINABANG GIKAN SA DSWD GISUGAL?
Gibalhin na sa Cebu City Government ang kapin sa 40 ka mga asymptomatic coronavirus disease (Covid-19) positive gikan sa sityo Zapatera, Barangay Luz, Dakbayan sa Sugbo ngadto sa Barangay Luz Elementary School.
Si Konsehal Dave Tumulak, kinsa maoy gisangonan ni Mayor Edgardo Labella sa pagpahiluna sa maong mga tawo, nagkanayon nga nalipay ang mga silingan sa mao nga mga tawo sanglit na-isolate na ang adunay Covid.
Gamit ang duha ka negative air pressure ambulance sa City Hall ug laing mga ambulansiya gikan sa Emergency Rescue Unit Foundation (Eruf ), gihatod ang 40 ka mga lumolupyo ngadto sa eskwelahan niadtong gabii sa Abril 21.
Ang mga asymptomatic, kansang mga balay kongkreto ug adunay koral, matod ni Tumulak, nagpabilin nga nahisubay usab sa protocol sa Department of Health (DOH) nga ipaubos sa home quarantine.
Ang nadala sa eskwelahan mao kadtong mga nagpuyo sa balay nga light materials.
Ang Department of Education nitugot na nga magamit ang ilang mga building para isolation center sa asymptomatic patient sa nagkadaiyang barangay sa siyudad.
Kadtong way eskwelahan adto sila ipahiluna sa ilang kanhi mga polling precinct diin sila namotar atol sa eleksyon.
Si Labella nipasabot nga ang mga eskwelahan gihimo nga isolation center para sa mga asymptomatic.
Ang mga quarantine facility sama sa Bayanihan Center, North Reclamation Area ug International Eucharistic Congress hall para sa mga Covid-19 positive nga adunay mild ngadto sa medium nga simtomas.
Ang adunay severe acute respiratory infection nga positive sa Covid kun grabe maoy dal-on sa tambalanan.