P9M natigom sa PRO 7

Nakatigom na og P9 milyunes ang Police Regional Office (PRO) 7 nga ilang itampo sa PNP Bayanihan Fund Challenge nga idugang sa pundo sa gobiyerno alang sa pagbatok coronavirus disease 2019 (Covid-19).

Si Police Brigadier General Albert Ignatius Ferro, direktor sa PRO 7, nagkanayon nga ang 9,000 police personnel ug 700 non-uniformed personnel niamot gikan sa ilang suweldo.

Mao kini ang ilang tubag sa hagit ni PNP Chief Archie Gamboa nga naninguha nga makatigom og P200 milyones nga tampo sa PNP nga pundo.

Gipasabot sa heneral nga ang PNP Bayanihan Fund Challenge dili pinugsanay sa personnel nga ubos ang ranggo lakip na sa mga sibilyan nga nagtrabaho sa PNP.

“We collected more than P8 Million from the voluntary donations of the PRO7 personnel. This is our way of showing our gratitude to the President, who has shown endless support to the PNP,” matod ni Ferro.

Dunay laing kapin sa P1 milyones nga ilang nadawat gikan sa pribadong sektor sama sa Police Advisory Council sa Central Visayas.

Ang mga miyembro sa Advisory Council kasagaran mga negosyante ug professionals ang nakigtambayayong aron makatigom og dakong kantidad.

“We want to thank everyone who contributed to our Bayanihan Challenge. The amount will go a long way in the President’s goal of raising funds to help the poorest of the poor,” dugang ni Ferro.

Gipasalig niya nga ang maong kuwarta dili kini mausik tungod kay ideretso nila kini pag hatag sa Camp Crame diin adunay resibo nga ihatag usab sa mga nag donar niini.

Samtang, ang consul general sa nasud sa China nga nag base sa Sugbo inabagan sa Philippine Chinese Chamber of Commerce and Industry ug laing pribadong sector ang mi donar usab ngadto sa kapulisan og mga bugas nga moabot sa 50 ka sako.

Mihatag usab kinig 8,000 ka masks, 200 sets sa personal protective equipment (PPE), 400 ka N95 nga surgical masks, 10 ka thermal scanners, 3,000 ka surgical gloves, 400 ka surgical goggles ug 20 ka gallon sa alcohol.

Lakip sa mitabang sa kapulisan ang kompanya ni Lucio Tan ug ang San Miguel Corp. nga mihatag usab sa mga ginallon nga alcohol ug disinfectant.

Si Secretary Michael Dino sa Office of the Presidential Assistant for the Visayas nanghatag sa mga PPE ug mga bitamina sa mga pulis nga nagsilbing frontliners batok sa Covid-19.