171 nasikop sa number coding; 16 way prangkisa
Dili mominos 171 ka mga motorista ang nadakpan tungod sa paglapas sa number coding sa dakbayan sa Sugbo sulod sa unang 24 oras nga simultaneous checkpoint quarantine patrol operation sa Cebu City Police Office (CCPO)
Samtang, 16 ka public utility vehicles (PUVs) ang nasikop sa Lang Transporation Franchising and Regulatory Board (LTFRB) 7 tungod sa Breach of Franchise.
NUMBER CODING
Si Police Colonel Josefino Ligan, hepe sa CCPO, nagkanayon nga ang tanang nadakpan gipang-isyuhan og citation tickets tungod sa paglapas sa executive order (EO) ni Mayor Edgardo Labella.
Gawas sa citation ticket, sila gipamulta sa Cebu City Transportation Office (CTO).
Nagsugod sila sa ilang operasyon niadtong Martes sa tungang gabii, Abril 21, ug natapos sa tungang gabii sa Miyerkules, Abril 22.
Nagpadayon pa ang ilang operation sa number coding karon.
Ang Station 6 sa Sawang Calero nga gipangulohan ni Police Major Eduard Sanchez milusad usab sa ilang checkpoint sa dalan V. Rama, siyudad sa Sugbo.
Ang kagamhanan sa dakbayan mipagawas og EO pag- limit sa mga sakyanan nga mobyahe.
Kadtong mga plate number nga nitapos sa odd number sama sa 1, 5, 7 ug 9 gitugotan nga makabiyahe matag Lunes, Miyerkules ug Biyernes.
Ang nagtapos sa 2, 4, 6, 8 ug 0 mahimo nga makabiyahe matag Martes, Huwebes ug Sabado.
PRANGKISA
Samtang, si LTFRB 7 Regional Director Eduardo Montealto, Jr. niinogon nga way special permits kining mga nasakpan nila nga nanagan sa kadalanan sa Sugbo.
Sa maong gidaghanon, 14 niini ang vans ug 2 ang bus.
Dugang ni Montealto nga wala kini nila gi-tag nga kolurom apan ilaha kining giisyuhan og ticket.
Alang sa unang kalapasan, P5,000 ang multa niini.
Gipahibawo ni Montealto nga kasagaran sa ilahang nadakpan, unang kalapasan kini nila.
Apan dunay usa sila nga nadakpan nga van diin ikaduha na kini nga nakalapas sa balaod, hinungdan nga niabot na og P15,000 ang multa sa operator niini.
Alang sa ikaduhang kalapasan, P10,000 ang multa niini samtang P15,000 sa ikatulo ug modesider ang LTFRB 7 kon i-impound ang sakyanan ug bawian sa prangkisa ang operator.
Nagsugod pag-monitor ang LTFRB 7 sa mga nanagan nga sakyanan sa kadalanan nga giabangan sa mga kompaniya niadtong Abril 6 ug ang 16 natala kini hangtod Abril 21, Martes.
Gipasabot ni Montealto nga kinahanglan nga mokuha og special permit ang tanang operator sa PUVs nga gigamit sa local government units (LGUs) o pribado nga kompaniya nga maoy gikontrata sa pag-shuttle sa mga kawani karon nga suspendido ang pampubliko nga transportasyon.
Dugang niini nga bisan paman og adunay prangkisa ang operator apan kinahanglan ang special permit karon nga gipaubos sa ECQ ang Central Visayas.
Libre ang special permit alang sa mga LGUs ug tourist transport Apan anaa ra sa P170 matag tulo ka adlaw ang special permit o nahulog nga P57 matag adlaw.
Nasayran nga lima sa nadakpan sa joint operation kini sa LTFRB 7 sa kapulisan.
Awhag ni Montealto sa operators nga kuha og special permit aron dili makamulta.