EOs ni Labella
Daghan ang naglibog niining duha ka bag-ong sunodsunod nga Executive Order (EO) 69 ni Cebu City Mayor Edgar Labella. Sa tinguha nga mapakunhoran ang mangumprahay sa merkado, ilabi na sa Carbon Public Market, niadtong Abril 16, milagda ang mayor nga ipasunod ang alphabetical order base sa unang letra sa apelyido sa mga mangumprahay.
Pasabot nga kadtong mga apelyido nga nagsugod og A, B, C, D, matag Martes ra sila tugotan ng makapangumpra sa Carbon Public Market.
Mao usab kini ngadto sa ubang mga apelyido depende sa mga adlaw nga sila lang ang gitugotan. Miyerkules - E, F, G, H; Huwebes – I, J, K, L; Biyernes – M, N, O, P; Sabado – Q, R, S, T, U ug Domingg – V, W, X, Y, Z.
Sa matag Lunes sirad-an ang maong merkado aron kini malimpiyohan ug ipaubos sa disinfection. So, gipaabot nga mahapsay ug mapatuman na ang social distancing.
Pero tulo ka adlaw gikan sa pagpa-implementar niini, laing executive order ang giluwatan na usab ni Labella.
Kini aron pagsanong sa reklamo ni Land Transportation Office (LTO) 7 Chief Victor Caindec sa grabing traffic nga namugna niadtong Abril 17, 2020.
Ubos sa maong EO 70, kinahanglan sundon ang number coding scheme nga ibase sa tagsatagsa ka plate number sa sakyanan.
Kadtong mga sakyanan nga ang katapusan sa ilang plate no., 1, 3, 5, 7, 9 makabiyahe lang matag Lunes, Miyerkules, Biyernes samtang ang 2, 4, 6, 8, 0 makadagan lang matag Martes, Huwebes, Sabado. Walay makabiyahe matag Dominggo.
Dinhi mitumaw ang conflict. Kon ang imong apelyido ug ang plate no. sa imong sakyanan dili magkatukma sa adlaw nga gitugot nga ikaw makabiyahe, kinsa may sundon? Ang unang EO o ang ikaduha? Unsaon man nimo pagpangumpra kon wala kay sakyanan? Just asking, Mayor Labella.