I want to be in love
Dugay-dugay gyud kong wa moreplay kang Al. Ambot ba, gilaoman ko na man unta nga sa madugay ug sa madali pangulitawhan gyud ko sa akong textmate bisan wa pa nga mi magkita. Mao na kini ang akong giingon kang Sol, nga kon love ko sab si Al, sugton ko kini bisan wa pa mi magkita sa personal.
Padayon kong gipamatyag ang pinitik sa akong kasingkasing.
Mitingog pag-usab ang akong selpon. Miusab sa pagteks si Al nako kay dugay man nga wa ko siya replayi.
“Pasensya na, Kathy, pero form the bottom of my heart love gyud tika.”
From the bottom of the heart gyud? Nahimuot ko sa giingon ni Al. Karaan nang estilo sa pagpangulitawo ang gigamit ni Al. Kinaraang mga pulong ug sum-ol na paminawon. Apan tingali, tungod sa kahinam ni Al nga nakapadayag na siya sa iyang gugma nako, maong nadala siya sa iyang gibati ug emosyon.
“Really?”
Gireplyan ko na si Al.
“Yes. True love ang gibati ko nimo.”
Way laing unod ang among pagteksanay ni Al, kondi ang iyang pagmahal ra nako. Ug kay wa pa man gyud ko makaseguro sa akong feeling niya, maong gidaygan ko siya nga after one week pa ko makadesisyon.
“Maghuwat ko, Kath.” “Ayaw sabta nga gipalaom tika, Al. Maybe di tika sugton, and maybe sugton tika. Only time can tell.”
Lawom nang gabii nga nahunong ang among pagteksanay ni Al.. Nalipay ko sa among pagteksanay ni Al. Hilom kong nangandoy nga unta love ko sab si Al.
Pagka ugma sa hapon nahiabot sa amo si Sol. Nagdala na sab siya og chessboard. Diha mi sa among lawn.
“Di lang una ta magduwag chess, Sol. Wa koy kiondisyon ron kay dugay kong nakatulog kagabii.”
Mikidhat si Sol nako. Naka-smile ko kay nakasabot ko sa naa sa iyang hunahuna.
“Nagteksanay na sab mo si Al, no? Unya, gipangulitawhan ka na niya, Kath?”
Mapahiyumon kong mitando. Mora bag akong gipanghambog ang pagpangulitawo ni Al nako. (SUMPAYAN)