Kasinatian ni coach Noel ug Huelar (I)
Pipila lang ka gutlo human nato masayri ang pagluthang sa atong higala nga si Mauie Huelar, kanhi sakop sa Univerity of San Jose Recoletos (USJ-R) Jaguars, niadtong Abril 17, 2020, unang misantop sa akong hunahuna mao si coach Jun Noel.
Kini tungod kay sa akong kasinatian, si coach Noel mao gyud ang usa sa nag-ugmad sa basketball career ni Huelar bisan niadtong sa wala pa kini masulod sa Jaguars.
Si Huelar, lumad nga taga Barangay 35, dakbayan sa Bacolod, didto nasigpati ni coach Jun sa University of St. La Salle-Bacolod.
Sa way pagpanuko iya gilayon kining gikuha alang sa iyang team Sunpride Foodmasters, ang sister-team sa Casino-IPI nga dinhi ra usab sa Sugbo nagbasehan.
Gawas sa Sunpride, si Huelar, gikuha usab sa USJ-R Jaguars alang sa Cebu Amateur Athletic Association (Caaa) nga karon mao na ang Cesafi.
Nahimong makasaysayon ang karera ni Huelar ubos sa Jaguars sanglit usa man siya sa mga lig-ong haligi nga nakaputol sa kauhaw sa USJ-R sa kampiyonato.
Ako nahinumdom nga ning tuiga, 1993, ang USJ-R nga ubos sa pagdumala ni coach Norberto "Titing" Manalili mipildi sa UV Green Lancers sa best-ofthree finals diha sa USC gym.
Kauban ni Huelar niadtong higayona, mao sila si Leodie Garcia, Eliezer Saramosing, Rhoel Lawas, Frankie Lastimoso, Joel Co, John Ferriols, Rex Armojallas, Bong Pineda, Jandy Taala, Bryton Mendez, Orlando Nacorda ug
Jerwin Gelbolingo.
Di nako hikalimtan nga sa Game 2 sa series, nasuspenso si Garcia kay nagbinigyanay man og si Botchoy Alforque.
Sa Game 3 wa na man tuod si Garcia makaduwa, apan si coach Titing nakakita og saktong tapak sa luna nga gibakantihan ni Garcia pinaagi sa paggamit ni Co nga maoy nahimong mahait nga hinagiban niadtong higayona.
Kadto maoy nakahatag og break ni Co. Ako nahinumdom sa akong ambush interview ni Co, nakahilak kini sa kalipay kay gawas sa kampiyonato didto usab nakuha niya ang dakong kompiyansa og pagsalig sa iyang kaugalingon.
Mao usab kadto ang katapusang kampiyonato nga naangkon sa Jaguars sukad masukad. Si Huelar maoy nahimong most valuable player (MVP) niadtong panahona.
Pilay dagan sa katuigan, nahimugso ang Metropolitan Basketball Association (MBA) ug si coach Jun Noel maoy gikuhang coach sa Negros Slashers.
Wa gilayon mag-usik og panahon si coach Jun sa pagkuha nila ni Huelar ug sa iyang laing batos nga si Ferriols nga taga Davao City.
Ning higayona ilang gikauban sila si Reynel Hugnatan, Jack Tanuan ug Johnedel Cardel nga mao na karon ang coach sa Columbian Dyip sa PBA.
Nindot og dagan ang Slashers sa unang season sa MBA tungod kay niabot sila sa National finals human nila mapukan ang Cebu Gems sa Southern Conference championships. Apan gipildi sila sa Pampanga Dragons ni coach Aric del Rosario sa National championships.
(Sumpayan Ugma)