CEBU CITY ECQ HANGTOD SA MAYO 15
GILUGWAYAN NI LABELLA TUNGOD SA NAGKADAGHANG MGA KASO SA COVID
Gilugwayan ni Mayor Edgardo Labella hangtod sa Mayo 15, 2020 ang implementasyon sa enhanced community quarantine (ECQ) sa Dakbayan sa Sugbo nga mapupos unta karong Abril 28, 2020.
Ang pamahayag sa mayor iyang giluwatan human nagpositibo sa coronavirus disease (Covid-19) ang 139 ka mga tawo sa labing uwahing
resulta sa massive swab tests. “The extended enhanced community quarantine would take until May 15, I would just like to clarify. But if the situation improves, I will have it lifted. If there are some guidelines being imposed by the IATF in Manila, then we will abide by it,” padayag ni Labella.
Ang mayor unang namahayag nga hangtod sa Mayo 30 ang pagpatuman sa ECQ, apan iyang napanglantawan nga dugay ra kini.
Iya usab nga napanglantawan nga mahuman na ang pagkatap sa Covid kon ang tanan magpuyo sa balay.
Si Labella nipatawag kang Police Colonel Josefino Ligan, officer-in-charge sa Cebu City Police Office, aron makapangandam ang iyang mga tawo, kinsa maoy nag-man sa mga
border, kauban ang mga sundawo ug force multipliers.
NADUGANG
Sa 139 nga bag-ong mga positibo, 123 kanila mga piniriso gikan sa New Cebu City Jail male dormitory. Ang mao nga mga tawo
asymptomatic, kun way simtomas sa sakit ug gilain na ngadto sa lain nga building para di makatakod sa laing mga piniriso.
Ang mga kaso sa Barangay Labangon nadugangan og siyam.
Si Barangay Kapitan Victor Buendia ni-lockdown sa barangay sugod niadtong Martes, Abril 21, aron di yanong makawas ang mga lumolupyo.
Kini human niabot og lima ka mga kaso sa Covid sa iyang barangay.
Si Buendia nisira sa dagkong mga dalan nga nagpalibot sa iyang barangay sama sa Katipunan, Tres de Abril, El Salvador extension ug Happy Valley.
Ang gitugotan nga makaagi kadtong magdala og mga pagkaon ug uban pang batakang mga panginahanglanon paingon sa Labangon.
Laing tulo ka kaso gikan sa Barangay Luz, usa sa C. Padilla, usa sa Barangay Kasambagan, usa sa Inayawan ug usa ang na-test gikan sa City Health Department.
NGANONG MIDAGHAN
Gipasabot ni Labella nga daghan og mga kaso ang Cebu City itandi sa ubang mga local government sanglit aduna kini kapasidad sa massive
tests gumikan sa presensiya sa 36,000 ka swab kits, 10,000 gitugyan ngadto sa Department of Health (DOH) 7.
Dugang sa mayor nga ang City Health nipahigayon og massive testing, contact tracing ug ang ilang gimugna nga clinic nga gi-cluster ang mga barangay para maoy mo-eksamin sa adunay influenza like illness (ILI).
Kini nahimutang sa Barangay Pit-os sa north, Barangay Basak San Nicolas sa south, Sawang Calero sa west, Barangay Tinago sa East ug Cebu Medical Society Compound sa Barangay Banilad ang sa central.
Samtang gipadayag ni Labella nga nag-negatibo sa ikaduha ug sunodsunod nga
test ang masusuo nga bag-ong natawo sa Vicente Sotto Memorial Medical Center kinsa unang gika-report nga positibo sa Covid-19.
Sa kinatibuk-an, niabot na og 312 ka mga tawo nga nag-positibo sa Covid-19 sa dakbayan, sagad kanila walay sintomas.
LAPU NADUGANGAN
Laing lima ka mga tawo sa Dakbayan sa Lapu-Lapu ang napuno sa talaan sa mga nagpositibo sa Covid-19.
Ang pagkadiskobre resulta sa gihimong massive testing sa dakbayan.
Kini maoy gikompirmar ni Mayor Junard Chan kagahapon, Abril 22 sa dihang nahinabi sa Superbalita Cebu pinaagi sa tawag sa telepono.
Ang mga nagpositibo naggikan sa Barangay Marigondon, Gun-ob, Babag nga adunay tagsa ka mga pasyente, samtang duha gikan sa Barangay Lo-oc.
“Nag-massive testing na ta, mosaka (gidaghanon sa konpirmado) pa gyud ni siya. Full blast
(massive testing) ta next week puhon,” pamahayag ni Chan.
Iyang gipanglantawan nga mosaka pa ang gidaghanon sa mga konpirmado sa umaabot nga adlaw.
Ang massive testing sa LapuLapu gisugdan niadtong human sa Semana Santa diin nalakip sa unang batch ang grupo ni Chan ug ubang mga frontliner nga gipangkuhaan og swab sample.
Gisundan kini sa mga personnel sa City Social Welfare and Development.
Gitug-an sa mayor nga gibana-bana nga kapin sa 50 ka tawo ang gipa-ubos sa massive testing, kagahapon lang adlawa, Abril 22. /