Cash sa 4PS, SAP gisugal?

Tulo ka mga inahan nga beneficiary sa hinabang sa gobiyerno alang sa mga apektado sa enhanced community quarantine (ECQ) nangabilanggo human madakpi samtang nag tong-its, giingong gamit ang cash nga ilang nadawat, isip pusta.

Ang tulo posibleng matangtang sa listahan sa Pantawid Pamilyang Pilipino Program (4Ps) ug Social Amelioration Program (SAP) sa Department of Social Welfare and Development (DSWD) tungod sa ilang gibuhat.

Sila si Nancy Quibuyen, 36, minyo; Edna Ilustrisimo, 42, minyo; ug Eva Rayco, 30, minyo nadakpan sa kapulisan sa lungsod sa Santa Fe, mga isla sa Bantayan Sugbo, niadtong Martes sa udto samtang nagsugal sa N.H.A., Barangay Maricahan sa mao nga lungsod.

Ang tulo wa na makadagan pag-abot sa kapulisan.

Si Police Master Sgt. Rico Renoquio, imbestigador sa sa Santa Fe Police station nga nahinabi sa Superbalita Cebu, niingon nga nakadawat silag tawag gikan sa concerned citizen kabahin sa mga babaye nga nagsugal daplin sa dalan.

Wa sila maglangay, dali nilang gisuhid ang dapit ug naabtan ang tulo. Nakuha sa kapulisan ang P30 nga gisugal.

Sumala pa ni Renoquio nga dugay nang gireklamo sa mga tawo sila si Quiboyen, Ilustrisimo ug Rayco nga kanunay magsugal og tong-its, diin daghan sab ang modugok kay posibling miabay sa pagpusta.

Gibutyag ni Rayco nga si Edna bag-uhay lang nakadawat sa hinabang sa goberno kay usa kini miyembro sa 4Ps.

Lakip sila Quibuyen ug Rayco giingong nakadawat sab sa cash assistance sa kagamhanan, apil na ang bugas.

"Ang nakapait ani nila kay ang hinabang sa goberno gipusta sa sugal. Bag-ohay lang nakadawat. Maayo unta gipamalit og pagkaon sa pamilya," dugang ni Reboquio.

Ang Superbalita Cebu nitawag kang Alfamina Saagundo, chief sa DSWD sa lungsod, apan nagsige lang og ring ang telepuno.

Si Police Colporal Roniel Omaran, desk officer sa Santa Fe Police station nga nahinabi sa Superbalita Cebu, nibutyag nga mga alas 2 sa Miyerkules sa hapon, ang tulo ka mga inahan nakapiyansa og tag P18,000 matag usa sa kasong kalapasan sa Presidential Decree (PD) 1602 kun illegal gambling sa sala ni Judge Romeo Dolutano sa lungsod sa Santa Fe.

Matod ni Omaran nga magsilbe kining leksyon sa maong mga inahan ang ilang nahiaguman nga nibaliwala sa ECQ, nagsigeg sugal.

HAYAN TANGTANGON

Posible nga matangtangan og ayuda sa gobyerno kining mga nadakpan nga nagsugal nga daw gamit ang kwarta sa 4Ps ug SAP.

Matod ni Department of Social Welfare and Development (DSWD) 7 Assistant Regional Director Shalaine Marie Lucero nga mamahimong mo-report ang kapulisan ngadto sa Municipal Link nga na-assign sa usa ka lungsod aron ipaubos sa imbestigasyon ang nasakpan nga nagsugal gamit ang ayuda sa gobyerno.

Dugang ni Lucero nga kining kwartaha dili kini alang sa sugal, apan alang kini sa pagpamalit sa nag-unang palaliton hilabi na nga naglisod karon ang mayoriya sa katawhan subay sa krisis sa Covid-19.

Niklaro si Lucero nga ipaagi sa sakto nga proseso ang maong pasangil.

Gawas sa pagkuha sa pangan sa giingon nga nagsugal gamit ang ayuda sa gobyerno, ila kining i-evaluate ug kuhaan sa ilang habig sa di pa sila modesisyon kon tangtangon ba kini o dili.

Kon sa 4Ps ang basehan, ipaubos sa Grievance Redress System (GRS) ang maong benepisyaryo diin resolbahon ang isyu nga giatubang sa beneficiary.

Lakip sa gipaubos sa GRS kining gi-prenda ang cash card, gisugal ang kwarta nga nadawat, ug kining wa na gihimo sa ginikanan ang responsibilidad ngadto sa mga anak niini.

"If they continue to commit that and found out (guilty) with due process, they will be delisted sa atong Pantawid Program," si Lucero nagkanayon.

Alang usab sa SAP diin karon lang kini nga programa, mamahimo nga modesider ang local government unit tungod kay sila man usab ang nanglista sa mga beneficiaries niini.

Kon unsa ang anaa sa ordinansa sa LGU kabahin sa SAP, mamahimo kining i-apply sa sa nakalapas niini, apan kinahanglan gihapon ang due process matod ni Lucero.

Gipaabot na nila sa Regional Advisory Council diin lakip kini sa Inter-Agency Task Force nga mohimo og resolution sa pag-address niining ingon niini nga insidente.

Awhag ni Lucero sa mga benepisyaryo nga gamiton og tarong ang kwarta nga ayuda sa gobyerno hilabi na karon nga krisis. /