INOUE GIPIKHAN NI CASIMERO
Nibuhi og mahait nga mensahe si World Boxing Organization (WBO) bantamweight champion Filipino John Riel Casimero sa umaabot niyang kontra nga si Japanese "Monster" Naoya Inoue.
Sa interbyu sa Manila Bulletin nga napatik sa www. boxingscene.com, si Casimero nitambag kang Inoue nga mag-ensayo og maayo aron nindot ug kulbahinam ang ilang away.
Ang duha ka mga boksidor nakatakda untang magsangka karong Abril 25 sa Las Vegas sa usa ka world unification bout apan nauswag kini sa wala pa matino nga petsa gumikan sa pagkuyanap sa coronavirus disease (Covid-19).
Si Inoue, kinsa usa ka boxing superstar sa iyang nasod, maoy tag-iya sa World Boxing Association (WBA) ug International Boxing Federation (IBF) bantamweight titles.
Basi sa iyang nasaksihan sa katapusang away ni Inoue batok sa laing Pinoy nga si Nonito Donaire, nagtuo si Casimero nga kaya niyang i-knockout si Inoue.
Midaog man tuod si Inoue batok kang Donaire pinaagi sa desisyon, apan sulod sab sa pipila ka mga higayon kining gipabarag sa Filipino Flash.
Si Casimero miilog sa WBO title pinaagi sa makapaukyab nga 3rd round TKO nga kadaugan batok sa grabe ka inilog nga si South African Zolani Tete niadtong Nobiyembre sa miaging tuig.
Nanghinaot si Casimero nga lig-on og apapangig si Inoue aron nindot ang ilang away dili sama kang Tete, kinsa yano niyang gipaundang.
Human nauswag ang ilang away, si Inoue nakabalik na sa Japan samtang si Casimero nakadesisyon nga magpabiling na lang sa Las Vegas kauban ang iyang trainer nga si Nonoy Neri aron adto ipadayon ang iyang pagpangandam.
Gipasabot ni Casimero nga wala ra sab siya'y mahimo kon mobalik siya sa Pilipinas gumikan sa enhanced community quarantine nga gipatuman hapit sa kinatibuk-ang nasod.
Matod ni Casimero nga gipalabi niyang magpabilin sa Las Vegas aron maseguro nga magpabilin ang iyang kondisyon samtang naghuwat siya nga mobalik sa normal ang sitwasyon.
Gitataw ni Casimero nga bisan sa iyang naabot, wala gihapon nawagtang ang iyang kahidlaw nga makaposte og kadaugan hilabi na sa dakong away nga sama niini.
Si Casimero, 31, naggunit og 29-4, 20KOs nga rekord samtang si Inoue, 27, naghupot og 19-0, 16 KOs nga baraha.