FAJARDO MISUPORTA SA BRY. LUZ
Nagmalipayon ang Cebuana volleyball star nga si Cherry Ann Rondina nga nisuporta kaniya ang Sugboanong higante nga si June Mar Fajardo sa iyang lakang aron makatabang sa frontliners sa Brgy. Luz, Cebu City.
Si Rondina, kinsa produkto sa University of Santo Tomas sa Manila, nagpa-auction sa iyang ang mga jersey, sapatos ug uban pang mga gamit aron makatigom og pundo aron itabang sa frontliners nga na-assign sa Brgy. Luz, ang labing apektadong barangay sa dakbayan sa Sugbo sa pagkuyanap sa coronavirus disease (Covid-19).
Dihadiha dayon, mitabang sa UAAP Season 81 MVP ang iyang kaubang mga atleta sa UST sama nila ni Mark Nonoy, Renzo Subido, Imee Hernandez, Milena Alessandrini, Rhenz Abando, ug Ysa Jimenez, kinsa pulos sab nipa-auction sa ilang jerseys.
Aduna pa’y daghang mosunod sa pagtabang kang Rondina lakip na si Fajardo, kinsa 6-time MVP sa Philippine Basketball Association (PBA) ubos sa kampo sa San Miguel Beermen.
“Ito, pinaka-the best. Si ( June Mar) Fajardo,” matod ni Rondina sa interbyu sa ABS-CBN.
“Buti na lang, nadala ko pa sa kiliti.”
Gibutyag ni Rondina nga iyang paryente si Fajardo, kinsa lumad nga taga lungsod sa Pinamungajan, Cebu ug produkto sa University of Cebu (UC) Webmasters.
Gipasabot ni Rondina nga dako niyang kalipay dihang misanong si Fajardo sa iyang hangyo.
“Pinsan ko ‘yun eh. Ang alam ko kasi, pinsan namin ‘yung pinsan niya. Basta pinsan kami, kahit malayo, pinsan pa rin,” matod ni Rondina.
Matod ni Rondina, kinsa lumad nga taga lungsod sa Compostela, Cebu, nga lakip sa gipa-auction ni Fajardo mao ang champion jersey nini sa PBA.
“Maganda, kasi tagadito rin ‘yun eh, taga-Cebu din siya,” dugang ni Rondina.
Niadtong Martes, Abril 21, 2020, si Rondina nakatigom na sab og P35, 000 gikan sa mga ningsuporta kaniya.
Ang tanan nga makita ni Rondina iyang gamiton aron ipalit og mga PPE (personal protective equipment) alang sa frontliners sa Brgy. Luz.
Kon aduna man gani masobra, matod ni Rondina nga iya sab kining itabang sa frontliners sa ilaha ng lungsod. Alang sa dugang mga impormasyon kabahin sa lakang ni Rondina, mahimong mobisita sa Facebook page nga PPEs for the Frontliners of Brgy. Luz, Cebu.