PULIS, SUNDAWO BANTAY SA JAIL

PANAGANA KON MAGUBOT ANG CEBU CITY JAIL TUNGOD SA COVID

Human nagsaba-saba ug nagkaguliyang sa New Cebu City Jail niadtong Miyerkules sa hapon tungod sa kadaghan na sa natakdan sa coronavirus disease (Covid-19) sa mga binilanggo, ang pasilidad gibantayan na og mga pulis ug sundawo sugod sa Huwebes, Abril 23, 2020.

Gipaneguro sa Bureau of Jail Management and Penology (BJMP 7) nga sila andam kon ugaling moulbo ang kasamok tali sa 6,000 kapin ka mga persons deprived of liberty (PDL) kun mga binilanggo.

Mokabat sa 114 ka mga binilanggo ang positibo, duha niini naa sa usa ka tambalanan sa Dakbayan sa Sugbo. Duna say 13 ka jail officers.

Matod ni Jail Superintendent Julius Arro, warden sa city jail, hugot ang ilang pagbantay sa sulod sa pasilidad.

Gidugangan kini og mga Special Weapons and Tactics (Swat), Regional Mobile Force Battalion, mga pulis sa Cebu City Police Office (CCPO) ug mga sundawo sa Central Command ubos sa Task Force Cebu.

“As far as security aspect is concerned, naka red alert man kami diri tanan and we can assure the public that we can manage the situation. And then, don't you know na ang atong friendly forces, the PNP and the AFP, ay nag susuporta sa ato,” matod ni Arro.

NAGPATAGAD

Nipasabot si Arro nga ang pagsaba-saba sa mga binilango sulod sa ilang mga selda niadtong Miyerkules gitumong aron lang matagad sila sa gobyerno.

Dali niya nga gipatawag ang mga lider sa matag brigada aron masayran unsay ilang demanda.

Si Police Colonel Josefino Ligan, officer-in-charge sa Cebu City Police Office, nipasalig nga andam na ang iyang personnel nga mo responde sa sulod sa jail kon motumaw ang tensyon sa mga binilango.

Adunay kapin sa 100 ka mga pulis nga iyang gipadala nga naglangkob sa duha ka mga team sa Cebu City Swat, inabagan sa Provincial Mobile Force Company lakip na ang duha ka sakyanan sa mga sundawo gikan sa Centcom ug aduna pay standy nga Crisis Response Battalion. Si Konsehal Dave Tumulak niklaro nga way riot sulod sa pasilidad.

"Duna nay mga pulis sa gawas. Ang nahitabo kagahapon, nag noise barrage sila human nakakita sa daghang pulis unya dungan sa pagpahibawo sa mga nag-positive ug ang ubang piniriso nag-komedya nga buhian na sila ug ang uban gusto mahibawo kinsa ang nag-positive kay ilang i-isolate hinungdan nga nasaba," padayag ni Tumulak.

Si Mayor Edgardo Labella nipada na usab og 1,500 ka mask ug 200 ka face shield para sa mga personnel nga gitunol ni Tumulak ngadto kang Arro.