Gwen: Mga ipangtumod sa Carbon kutob nalang sa South Bus Terminal

Sugod Huwebes, Abril 23, kutob na lang sa Cebu South Bus Terminal (CSBT) ang tanang motumod og mga utanon, isda ug uban pang ibaligya sa Carbon Public Market ug Pasil Fish Port sa dakbayan sa Sugbo.

Mao kini ang gipahibalo ni Gobernador Gwendolyn Garcia kagahapon, Miyerkules, atol sa regular press conference sa Kapitolyo.

Giklaro ni Garcia nga wholesale o dinaghan ang pagpalit sa bagsakan centers, dili ang ginagmay lang.

Kon mopalit og utanon kinahanglan nga moabot sa 100 ka kilo ang imong paliton samtang tulo ka banyera usab sa isda.

Busa gipaabot nga sagad sa mangompra sa bagsakan mao kadtong mga tindera sa Carbon ug Pasil.

Samtang, sukwahi sa unang pamahayag ni Garcia nga duha ka mga bagsakan centers ang ablihan nga anaa sa Cebu North Bus Terminal (CNBT) ug CSBT.

Giklaro ni Garcia nga usa na lang ang padulngan sa tanan nga mo-deliver ug anha na kini sa CSBT.

“Wala to madayon ang North bus terminal didto sa Mandaue so ang tanan ari nalang sa south bus terminal ang tanan nga gikan sa North ug South. Kining mao nato nga bagsakan center sa south bus terminal atol napahigayon sa cooperation sa Cehu City Government thru the Cebu City Market Administrator,” matod ni Garcia.

Sa habagatan nga bahin sa Sugbo, ang lungsod sa Argao, Alcoy, Balamban, Barili, Boljoon, Carcar City, Dalaguete ug Sibonga ang nalista nga maka tumod og supply.

Samtang sa amihanan ang lungsod sa Medellin, Danao, San Remigio ug Daanbantayan usab ang gitugotan.

Niadtong Huwebes sa kaadlawon, Abril 23, una nga mitumod og supply mao ang lungsod sa San Remigio.

Alas tres pa lang sa buntag mobukas na ang CSBT alang sa mga moabot nga supply.

Ang maong paagi, apan matod ni Garcia nga kinahanglan kini nga buhaton aron maluwas sa hulga sa coronavirus disease (Covid-19) ang mga Sugboanon nga drivers ug truckboys nga mo-deliver.

“So, mao ni atong gihunahunaan nga paagi aron mahugtan pa gyud nato ang atong measures nga lagi dili mag takodtakod ang coronavirus, kay ang kining atong mga nag-deliver, ang drivers , ang delivery men mo naog ma-xposed napod. Sa niining paagiha kutob ra sila sa southbus, inig human pauli na sila sa probinsya,” matod ni Garcia sa mga tigbalita.

Gipahinumdoman ni Garcia ang mga mo-deliver nga duha lang ka mga tawo ang pwede makasakay sa trucks ug istriktuhon ang pagpahigayon sa kapulisan sa checkpoint sa borders nga agian niini.