Mga malapason sa lagda sa ECQ gidakop
Padayong higpit ang pagpanakop sa kapulisan sa lalawigan sa mfa malapason sa lagda sa enhanced communiry quarantine (ECQ) BANTAYAN
Manag-agaw nga giingong pulos nakainom nga nasakay sa managlahi nga motorsiklo ang giposasan sa pulis nga nagbantay sa usa sa ECQ checkpoint sa lungsod sa Bantayan.
Si PSSgt. Kent Formentero sa Bantayan Police Station nga nahinabi sa Superbalita Cebu miila sa duha nga sila si Jayson Maspara, 40, molupyo sa NHA, Barangay Kabac, Bantayan ug Edmund Luyao 46, minyo ug molopyo sa Sityo Malinawon, Barangay Pilim lungsod sa Madredijos.
Matud ni Formentero, pasado alas 7:00 sa gabii niadtong Miyerkules, Anril 22, ang ilang kauban nga si PSMsgt. Ben Almonicar nga nagbantay sa ECQ checkpoint sa provincial road sa Barangay Putian, Bantayan.
Ang duha ka mga motorista gipahunong sa pulis ug mga barangay tanod aron pangutan-on ug pangitaan og quarantine passes.
Apan ang duha giingong nangasaba na hinuon sa mga nagbantay sa ECQ checkpoint ug usa sa mga suspek ang nisinyas og ‘fuc... you’ ngadto sa pulis.
Si Almonicar mipahibawo sa Bantayan Police Station bahin sa nahitabo ug na-request og patrol car aron ang duha dalhon sa ilang estasyon.
Atol ning pagsuwat, ang duha ka mga motorista gikatakda nga pasakaan og kaong kalapasan sa executive order (EO) 25 section 4A o ang pagdili sa paggawas sa ilang balay nga walay igong rason.
Gawas sa maong kalapasan, mag-atubang ang duha og kaso sa pagsukol sa awtoridad nga nagbantay sa mga ECQ checkpoint.
CARCAR CITY
Samtang, usa pa ang laing nadakpan sa Barangay Poblacion 2,l dakbayan sa Carcar habagatanga bahin sa Sugbo, alas 6:00 sa buntag kagahapon, Huwebes, Abril 23.
Si PSsgt. Japhet Saavedra sa Carcar City Police Station miila sa dinakpan nga si Dirk Longaket, 31, ug molupyo sa maong barangay.
Si Longaket gidakop sa hepe barangay tanod sa Barangay Poblacion 2 nga kanhi pulis human gisita sa tinugyanan sa ECQ checkpoint tungod sa wala pagdala og quarantine pass.
Dugang ni Saavedra nga si BT Meliton Agadier, kinsa maoy misita kang Longaket kalabot na sa wala kwentas niini og quarantine pass, apan giingong nasuko pa ang maong batan-on.
Si Longaket nasayran nga giingong mopadulong unta merkado apan wala na mahinayon human madala sa estasyon sa kapulisan.
TALISAY CITY
Dul-an sa 1,237 na ka mga tawo ang nadakpan sa Talisay City Police Office nga nilapas sa kamandoan ECQ sukad sa pagsugod niini niadtong Marso 30, 2020 hangtod Abril 21, 2020.
Sigon ni Police Major Gerard Ace Pelare, hepe sa Talisay City Police Station nga ang maong mga dinakpan nakalapas sa kamandoan ni Governor Gwen Garcia sa iyang executive order sama sa curfew, nangaligo ug dagat, walay quarantine pass ug wala nagsul-ob ug face mask.
Ang Barangay Tanke mao ang pinakadaghanan ug mga dinakpan diin anaa kini 169 kabuok samtang ang labing gamay mao ang Camp 4 diin anaay kini walo lang ka dinakpan.
Dungag ni Pelare nga ang maong mga dinakpan gitanggong sa Cansojong Temporary Detention Facility sulod sa 12 ka oras diin adunay lecture bahin Covid-19 ug ECQe.
“They will be charged accordingly. I-detained sila nya i-charge sila then its up to them to defend theirselves.” saysay ni Pelare sa Superbalita Cebu.