Kuwang og plano

Gilugwayan na ni Cebu City Mayor Edgardo Labella ang enhanced community quarantine (ECQ) ngadto sa Mayo 15. Mapupos unta ang ECQ sa Abril 28. Lahos unta gani kini sa Mayo 30, apan nausab ang huna-huna sa mayor nianang hapon sa Miyerkules Abril, 22, 2020, kay gitas-an ra siya mao nga gidugayon.

Kining pag-usab-usab sa huna-huna sa mayor nagpakita sa kakuwang sa plano sa iyang administrasyon sa pagkombate sa coronavirus disease aron di kini makakatap.

Posible usab nga dunay pressure sa mga sector nga apektado na kaayo sa ECQ nga gipatuman sa mayor. Usa niini ang mga negusyante, kinsang mga patigayon lakip sa nahunong. Kon way operasyon, way kwartang mosulod. Patay ang negusyo ug ekonomiya.

Ang anam-anam nga pagpatuman sa mga lakang, sama sa number coding sa mga sakyanan, letter coding sa mga mangomprahay sa Carbon ug pipila pa timaan sa kakuwang og direksyon sa administrasyon karon.

Niadto pa lang unta sa pagsugod sa Covid sa dakbayan, naghanay na sila og mga plano alang sa mga lakang nga pagahimuon.

Dihang nabantayan nga nagdasok ang mga tawo sa merkado publiko sa Carbon, diha pa nipatuman ang City Hall og letter coding sa mga mangomprahay. Dihang nireklamo na si Land Transportation Office (LTO) Director Victor Caindec sa kadaghan sa mga sakyanan nga nanggawas sa dalan, diha pa dali nga gipatuman ang number coding. Sa ato pa, nag-agad sila sa dagan sa mga hitabo una pa sila mo-react.

Di unta kini maingon niani kon duna pay pagplano pinaagi sa paglantaw sa posibleng mangahitabo sa unahan. Gipaabot na unta nila kining kadaghan sa mga tawo nga manglakaw bisan dunay ECQ. Manggawas nga mga tag-iya og sakyanan ug uban pa. Unsay mga lakang nga ipatuman kon padayong mosaka ang mga kaso sa Covid-19.

Ning nahabiling mga adlaw, hinaut pang duna nay kongkretong plano sila si Labella ug kaubanan.