Extension sa ECQ
Gilugwayan ni Cebu City Mayor Edgardo Labella hangtod sa Mayo 15, 2020 ang enhanced community quarantine (ECQ) sa dakbayan sa Sugbo. Matapus na unta karong Abril 28 ang unang ECQ nga iyang gimando. Ang maong desisyon nakab-ot sa mayor ug sa crisis committee gumikan sa nagkataas nga mga kaso sa coronavirus disease (Covid-19) dinhi sa dakbayan. Matag adlaw nagkataas ang mga kaso sa mga nagpositibo.
Niadtong miaging adlaw lang, mokabat ngadto sa 100 usa ang mga nag-positive, kadaghanan niini mga binilanggo sa Cebu City Jail. Hinuon, kining extension sa mayor, magdepende sa dagan usab sa gidaghanon nga magpositibo matag adlaw. Puwede kini niyang libkason kon pananglitan dili daghan ang matakbuyan. Mag-agad pod siya sa dugang guidelines gikan sa task force sa national government.
So, hangtod sa Mayo 15, mao ra gihapon ang set up o sistema. Dili gihapon bukas ang malls, restaurants, bars ug uban pang balay patigayon. Wala gihapoy public transportation nga tugutang makadagan sa kadalanan.
Stay at home policy gihapon aron di makakuyanap ang kagaw. Patay gihapon ang ekonomiya.
Sa pangutana kon aduna bay igong resources ang Kagamhanan sa Dakbayan sa Sugbo sa paghatag og ayuda sa mga Sugboanon nga maapektuhan sa extended lockdown, nagkanayon ang mayor nga iyang paningkamutan nga matubag ang panginahanglan sa katawhan.
Posibleng aduna pay dugang ayuda nga ipagawas ang City Hall gawas niadtong unang gipanghatag ngadto sa mga barangay ning dakbayan. Ang mga barangay nakadawat og P3 milyones, P2 milyones ug P1 milyon, depende sa gidak-on sa barangay. Nanghinaot si Mayor Labella nga makasabot ang kadaghanan sa mga Sugboanon sa iyang nakab-ot nga desisyon. Kini aron lang gyud nga maprotektahan ang panglawas sa kadaghanan. Public health versus ekonomiya lang gihapon ni.