ECQ gilugwayan
Gilugwayan ni Cebu City Mayor Edgardo Labella niadtong Miyerkules ang gipatuman nga enhanced community quarantine (ECQ) dinhi sa syudad hangtod sa Mayo 15, 2020 tungod sa pagsaka sa gidaghanon sa mga tawo nga gitakdan sa Covid-19.
Ning atong pagsuwat, 312 na ka mga kaso sa Covid-19 ang natala sa syudad nga karon maoy nag-una sa mga kaso sa coronavirus sa Central Visayas. Apan naglabi kanila way mga sintomas, way gipamati sa lawas, pero delikadong manakod sa laing mga tawo.
Nagsugod ang ECQ dinhi sa syudad sa Sugbo niadtong Marso 28 ug gikatakda unta nga matapos karong Abril 28. Gilugwayan kini sa mayor tungod sa iyang kabalaka nga daghan pa unya ang matakdan sa maong balatian.
Ang ECQ usa sa mga hinagiban sa gobyerno sa pagkontrolar sa pagkuyanap sa coronavirus. Magpuyo ang mga tawo sa ilang mga balay. Dili manggawas aron di matakdan. Kon natakdan na, dili manggawas aron dili manakod.
Laing hinagiban mao ang targeted testing ug contact tracing aron mahibaw-an kon si kinsa ang positibo unya pangitaon ang mga tawo nga iyang gikahimamat aron ma-test ug mahibaw-an kon wa ba takdi.
Apan sa ako nang giingon dinhi, kinahanglan gyud ang usa ka quarantine facility aron ilahi ug ihiklin kadtong mga positibo sa usa ka lugar aron di sila manakod. Gitukod pa ang quarantine facility sa syudad didto sa North Reclamation Area nga mokostar og P100 milyones.
Sa akong tan-aw, ang ECQ usa ka espadang duhay suwab. Makaayo, pero makdaot sab. Epektibo kini sa mga lugar nga posible ang social distancing kay wa magsikit-sikit ang mga balay.
Apan dili kini magsilbi sa mga lugar nga nagdasok ang kabalayan ug nagsinardinas ang mga tawo.
Atong kapanaminan ang nahitabo sa Sitio Zapatera sa Barangay Luz. Sa gidaghanon sa mga tawo, imposible ang social distancing. Nagsugod lang sa usa ka kaso ug dali kaayong nanaghan.
Mao sab ang nahitabo aa Cebu City Jail. Way ECQ kay di man gyud makagawas ang piniriso kon way court order. Pero imposible ang social distancing kay labaw pa sila sa sardinas didto. Sugod sa usa ka kaso, karon kapin na sa usa ka gatos. Isolation gyud aron di manakod.