I want to be in love
Morag gibati ko nga proud kaayo ko sa pagtug-an kang Sol nga gipangulitawhan na ko ni Al. Nagsigeg smile si Sol nako. Tingali, nakagusto siya sa akong mood niadtong tungora. Malipayon man kaayo ko.
“So, may dakong posibilidad nga sugton gyud nimo si Al, di ba, Kathy?”
Way hunong ang pagpahiyom
ni Sol.
“Well, may posibilidad kay sa akong paminaw malipayon man ko kon magteksanay mi.”
Miyangu-yango si Sol. Unya naghinuktok siya, ug morag dunay lawom nga gihunahuna.
“Ikaw, Sol, kanus-a man makabatog girlfriend?”
Wa dayon motubag si Sol. Gitan-aw ko niyag dugay.. Nakapangawot ko sa akong ulo. Di ko komportable sa tinan-awan ni Sol nako.
“C’mon, Sol. Please don’t look at me like that. Mora mag makahilos nang imong tinan-awan nako?”
Miginhawa pag-ayo si Sol. “Kon mosulod ka na anang seryusong relationship, Kathy, mosulod na sab ko.”
Nahikatawa ko ug nahapak kog hinay ang bukton ni Sol.
“Ikaw, ha, duna na diay naibgang girl pero wa gyud ka mosulti ani nako.”
“Nahadlok lang ko, Kathy, nga makahibawo ka ani.” “Sus, tagu-tago pa gyod na siya.” “Ug karon nakahibawo ka na, Kath.”
“Nakapangulitawo ka na niya, Sol?”
“O, bag-o pa lang. Naghuwat na lang ko sa iyang desisyon.”
“Aw, kon love ka sab niya, Sol, way rason nga di ka niya sugton.”
Ambot ba, mora man kog gisakitan sa akong gisulti. Morag mihuot ang akong dughan. Nagkatinan-away mi si Sol.
“Panghinauton ko ang imong kalipay sa imong lovelife, Kathy.” “Panghinauton ko sab, Sol, nga mahitabo kana sa imong lovelife.”
Anang pagka gabii, mora kog nag-alindasay. Wa gyud ko makasabot sa akong kaugalingon, sa akong gibati.
Unya kalit nga mikiring akong akong selpon. Usa ka incoming call. Kalit kong gikulbaan kay si Al ang nagtawag nako. Gibati ko ang kahinam kay madungog ko na gyud ang tingog sa akong textmate.
(TAPUSON SUNOD GULA)