Kasinatian ni coach Noel ug Huelar

(sumpay sa kagahapon)

Nag-ung-ong na gyud unta ang Cebu Gems sa kadaugan sa conference finals sa dihang nakaposte na kini og 3-1 nga bintaha sa series.

“One win na lang ilang (Cebu Gems) gikinahanglan, kay 3-1 man ang standing, unya host pa gyud sila sa Game 5. Pero ato mang natsambahan sila, so nag 2-3. Unya kami na man ang host sa remaining games, aw didto natiwas gyud namo sa Bacolod," saysay ni Noel.

Apan sa National finals mipatugbabaw ang dominasyon sa Pampanga Dragons ni coach Aric del Rosario aron hipuson ang unang MBA National title, 4-1.

Nagkakuyog usab si coach Jun ug Huelar sa Hapee Tootpaste-Philippines nga nagrepresentar sa nasod didto sa Thailand tournament.

Sa laktod nga pagkasulti, usa sa mga paboritong player ni coach Jun Noel si Huelar kay bisan asa siya nga team iya mang kuhaon ang flashy pointguard.

Si Huelar nakaduwa usab sa Philippine Basketball League (PBL) ubos sa Otto Shoes diin iyang gikauban si Edward Naron.

Nisalmot usab si Huelar sa PBA Drafting ug nakuha sa Air21. Apan wala modap-ig kaniya ang kahigayonan kay wala siya makapirma sa team.

Sa iyang paghibalik sa ilaha didto sa Bacolod, nisulod siya sa politika ug napiling kapitan sa Barangay 35. Didto nagsugod ang dag-om sa kinabuhi ni Huelar ug sa tuig 2016 naaresto siya sa mga tinugyanan sa balaod human kini gilambigit sa gidiling drugas. Sa tuig 2018 nahimo siyang gawasnon.

Sa niaging semana, sa message ni coach Jun Noel diri kanako, emosyonal siyang mipadayag sa iyang gibati.

Gani mibutyag si coach nga nianang Huwebes sa gabii, nanawag diay kaniya si Huelar ug nangumusta. Sa samang higayon nangimbitar kini kaniya nga unta makabisita kini sa Bacolod sa higayon nga molurang na kining krisis nga gimugna karon sa coronavirus disease 2019 kon Covid-19.

Apan nianang pagka Biyernes sa hapon mao na lay iyang nahibaw-an pinaagi sa social media nga gipatay si Huelar didto sa Barangay Villamonte sa Bacolod.

"Sakit kaayo pamatiyagon nga mamatyan ka og usa ka anak sa buhat. Maayong tawo labi na gyud sa iyang mga amigo dili plastic ug matinahuron. Sa basketball he is a team player and defensive stopper. God Bless His Soul," ni Noel pa.

Tungod niining stay-athome policy nga gipatuman sa tibuok nasod, wa makagahin og bisan gamayng panahon si coach Jun Noel nga makalili sa lawas ni Huelar. Gani wa sab siyay komunikasyon sa kabanay niini.

"Rest in Peace na lang ni Mauie," mao na lay igo napadangat sa beteranong coach kinsa lumad nga taga Consolacion, Cebu.

Sa tinud-anay lang, naikag usab ako sa pagsubay sa kamatayon ni Huelar, kay usa siya sa ako usab nga nasuod niadtong panahon nga dinhi pa siya nagbasehan sa Sugbo.

Pipila ka mga higayon nga mahikuyog ako sa grupo sa Sunpride niadtong ilang panahon. Sila maoy permi nako imbitahon og mga exhibition games ilabi na sa among barangay sa Pondol, lungsod sa Balamban niadtong mga panahuna.

Pipila ka mga higayon nga ako siyang ikainum-inum uban nila ni Ferriols, Leodie Garcia nga mao na karon ang coach sa USJ-R, coach Titing Manalili ug sa ubang mga players sa Jaguars.

Sama sa uban, nasinati usab nako ang batasan ni Huelar. Maayong modala og higala, bisan tuod og kulit kini kon anaa sa korte. Mahigalaon, maabi-abihon ug matinabangon. Mao nga usa usab kita sa gisayangan sa iyang sayo nga pagpanaw.

"Wala na atong amigo, Junmigs," maoy akong unang nadungog ni coach Leodie sa dihang ako siyang gitawagan, pipila lang ka oras gikan sa pagkahagba ni Mauie.

Wa usab namo kalikayi ni coach Leodie ang paghisgut sa mga nangaging panahon uban ni Huelar.

"Rest in Peace, Mauie."