MARCIAL MIKUNSOLTA SA MGA WORLD CHAMPIONS
Migamit sa YouTube ang malampusong amateur boxer sa Pilipinas nga si Eumir Marcial aron mokunsolta sa tulo niya ka mga kababayang world boxing champions kabahin sa pagbuhi og desisyon kon angayan na ba siyang mosaka sa professional rank.
Sa video nga gi-post ni Marcial sa YouTube, iyang gipangtawgan sila si Jerwin "Pretty Boy" Ancajas, John Riel "Quadro Alas" Casimero, ug 4-weight division champion Donnie "Ahas" Nietes aron mangayo og tambag.
Gumikan sa iyang maayong gipakita isip amateur boxer, daghang mitanyag kang Marcial nga mosaka sa professional boxing diin tataw nga mas dako ang maani kon pinansyal ang hisgutan.
Apan adunay panumpa si Marcial nga morepresentar siya sa Pilipinas sa umaabot nga Tokyo Olympics hinungdan nga nagduhaduha siya pagdawat og tanyag gikan sa professional rank.
Hinuon gipasabot ni Marcial nga basi sa lagda AIBA, ang usa ka professional boxer mahimong makaapil sa Olympics kon wala pa kini nakaabot og 15 ka mga away sa professional rank.
"Maganda 'yan, kasi kapag nakapaglaro ka na sa pro, maganda ang experience," tambag ni Ancajas kang Marcial nga napatik sa www.abs-cbnnews.com.
Nidugang si Ancajas nga mas mapalambo pa ni Marcial ang abilidad niini kon mag-training kini sa professional rank.
Gihulagway ni Ancajas si Marcial nga adunay dakong potensyal nga makahimo'g dakong pangalan isip professional boxer.
Si Casimero nipahimangno kang Marcial nga dili sayon ang away sa professional rank kumpara sa amateur.
"Pag lumalaban ka sa pro kailangan i-work out pa ang legs at stamina, kailangan marunong kang mag-mantain ng hangin," pasabot ni Casimero.
"Yung dati 4 rounds pagod na pagod na agad ako, ngayon sa pro ibang iba."
Sa panahom ni Casimero, adunay kapabilidad si Marcial nga molampos bisan asa kini moaway.
Gihulagway ni Casimero si Marcial nga adunay estilo sama sa professional boxer apan nagkampanya sa amateur rank.
Si Nietes, kinsa maoy Filipino longest reigning world champion, mitambag kang Marcial nga kon pangandoy niining makahatag sa Pilipinas sa labing una niining gold medal sa Olympics, hayan kinahanglan kining magtutok lang una sa amateur rank.
Wala man tuod niya naapil ang audio recording sa ilang panagsulti ni Nietes, asoy ni Marcial nga mao kini ang tambag sa ALA fighter.