INILANG BOXER NAG-VOLUNTEER
Taliwala sa kalit nga pagkaunlod sa iyang pangalan, dako gihapon ang pagtuo ni kanhi two-time world challenger AJ Banal nga mahibalik ra gihapon ang istado sa iyang boxing career kaniadto.
Ang 31-anyos nga lumad sa Barangay Ermita, dakbayan sa Sugbo, determinado nga sa iyang edad karon, sama sa uban, nagpabilin pa gihapon ang kahanas ug kalantip nga maoy naghatag kaniya og pangalan sa natad sa paugnat sa kusog nga iyang gihigugma.
Hinuon, iyang gipasabot nga kini dili mahimo sa madaling panahon kon dili nagkinahanglan kini og hataas nga pasensiya ug sakripisyo sa pag-ensayo.
Gipadayag sa multi-awardee amateur boxer nga wala pa mosantop sa iyang hunahuna ang pagretiro ug gani, kon dili pa ning nagpadayon nga hudlat sa coronavirus disease, hayan nagpadayon na unta ang iyang subsob nga training.
"Wa pakoy balak mo retire, Sir. Plano nako mo retire ko mga 34 or 35 years old. Pero karon dili pa 31 pako. Mag-focus ko after aning lockdown. Adto ko China fucos ko sa career nako," matod ni Banal sa online interview sa Superbalita-Cebu.
"Kaya pa basta mo-training lang og pag-ayo, nya disiplina. Pero karon way disiplina kay sige lang kaon. After aning virusa sir paningkamoton ko na ang tanan,"
Sa kasamtangan, giangkon sa giilang "Bazooka" ibabaw sa ring nga kuli kaayo niya ang pag-ensayo sa iyang kaugalingon karon tungod ning pagpahamtang sa gobiyerno sa enhance community quarantine (ECQ) aron paglikay sa virus.
Apan wa kini makapugong kaniya sa pag-itsa sa iyang ayuda sa ilang barangay ug boluntaryo kining mitanyag sa iyang serbisyo.
"Nag-volunteer ko dire sa Barangay Ermita, Sir para way magpabadlong. Boutan kaayo among kapitan dire, si Kap Mark Miral," butyag ni Banal kinsa adunay 362-1, 23 KOs nga record.
"Kanang mga gahi og ulo ug kanang naay parok (adik) mosulod sa amoa nga dili taga Ermita, mao na among dakpon," dugang niyang saysay.
Nagsugod og subang ang pangalan ni Banal human kini mipupo og sunodsunod ug impresibong kadaugan ubos sa pagdumala sa Ala Boxing Gym.
Apan mikid-op kini sa dihang nasugamak siya og duha ka higayon napakyas siya paglabni sa world title - batok sa Mexicanong si Rafael Concepcion niadtong Hulyo 26, 2008 sa Cebu Coliseum ug sa Thailander nga si Pungluang Sor Singyu sa 2012 didto sa Mall of Asia Arena sa Kaulohan.
Sa Podcast interview ni Paw Salud, giangkon ni Banal ang dakong kasagmuyo ug kaguol sa maong kapildihan nga maoy hapit nagtukmod kaniya ngadto sa laing dalan. Daw og sa nahugno ang iyang kalibutan sa pamoksing.
Apan luyo sa dakong kasagmuyo, nagpahipi ang mga tawo nga pabiling nagsuporta kaniya. Kini sila maoy nakahatag og laing panid sa iyang paglaom.
Tuod man, human sa maong kapildihan, mibangon ug mipupo og sunodsunod nga mga kadaugan si Banal.
Tuig 2016, nakahukom si Banal nga mobiya sa Ala Boxing Gym. Mitapon siya kampo sa Survival Camp ni Joven Jimenez, ang stable ni world champion Jerwin Ancajas, sa Manila ug karon sa usa na usab ka Chinese national.
Minyo sa usa ka kanhi singer nga si Junbeth, ang pamilyang Banal gitugahan og tulo ka mga anak - duha ka babaye ug usa ka lalaki nga maoy iyang jr.
Way malakip sa iyang plano nga himuon usab nga boksidor ang iyang Junior, apan kon mao man kini nasubay sa iyang kaugatan, wa siyay mahimo, gawas sa pagsuporta niini.
"Depende kung ganahan siya. Pero kung akoy pabot-on, dili jud ko ganahan boxeron akong anak kay kahibawo ko sa kinabuhi sa boxer," panapos ni Banal.