Awhag: Ordinansa batok diskriminasyon sa pasyente sa Covid-19 gikinahanglan
Usa sa mga asymptomatic nga coronavirus disease (Covid-19) nga pasyente sa Dakbayan sa Lapu-Lapu miawhag sa mga opisyal sa dakbayan sa pagpanday og ordinansahon nga gitumong aron kapanalipdan ang nangaayo na nga mga pasyente gikan sa diskriminasyon.
"Will they embrace me? Dili ba kaha ko nila i-discriminate?"
Mao ni ang kabalaka ni Annabeth Cuizon sa iyang kasinatian karon nga iyang gipaambot pinaagi sa Facebook live sa Sabado, Abril 25, 2020.
Si Cuizon, pangu sa City Social Welfare and Development Office (CSWDO) sa Lapu-Lapu City, naa na karon sa ika 10 ka adlaw nga isolation sukad siya na-admit sa ARC Hospitals sa Maribago, Lapu-Lapu City human siya magpositibo sa novel coronavirus, kagaw nga nagdala sa Covid-19.
Si Annabeth asawa ni kanhi Land Transportation Franchising and Regulatory Board (LTFRB) Region 7 Director Ahmed Cuizon.
Bisan tuod kon naa na siya tunga-tunga sa iyang duha ka semana nga isolation, nabalaka siya kon unsaon siya ug ang iyang mga kaubang pasyente sa pagtratar sa mga tawo human sila mangaayo.
"Can we do a legislation or issuance nga dili mi i-discriminate? Nga puhon og mogawas mi, dili mi lainon og tan-aw. Basin dili na niya mi pasudlon og opisina o dili na mi pasudlon og barangay. Makatrabaho pa kaha mi ani?" awhag ni Cuizon.
Daghang mga hitabo ang nakapadasig kaniya sa pagsulti alang sa mga pasyente sa Covid-19 ug kaubanan niyang social workers nga iyang giingon nga nanag-antos sa diskriminasyon.
Sa wa pa siya ma-admit, siya ang nangu sa pagpanghatag sa mga hinabang sa mga komunidad. Nasayod na siya sa risgo niadtong higayuna.
Nagpabilin siyang kalma human siya masayod nga nataptan sa mao nga sakit.
Gawas sa sakit sa iyang likod, way mga timailhan sa sakit.
Iyang mga kauban nga social worker mipailawom sa mass testing ug silang tanan negatibo hinungdan sa iyang kalipay.
Naguol si Annabeth sa iyang staff ug social workers nga gipangpinig tungod lang kay siya nga ilang pangulo, positibo sa Covid.
"Ang usa gani nako ka officemate nga naay papirmahan nako nagkurog kay di muari. I mean dili man siya muari. Ihatag ra man unta ng papel," asoy ni Annabeth.