I want you to be my lover

Didto sa atbang nga terrace, nalantawan ko si Gina nga malipayon kaayo samtang dunay gikaestorya sa selpon. Usahay madungog ko ang kusog niyang katawa. Silingan ra kaayo mi si Gina. Pulos two storie ang balay sa among mga ginikanan.

Misamot kaputi ug kawapa si Gina nga nakapuyo sa Canada og duha ka tuig. Sa paggraduate namo sa hayiskol gipaadto na si Gina sa iyang mga ginikanan sa Canada aron adto

moeskuwela sa college.

Si Gina ang kamanghoran, tulo silang magsuon. Ang iyang parents ug duha ka igsuon ang unang namuyo sa Canada. Si Gina nagpabilin sa ilang balay dinhi sa syudad, ug ang iyang Lolo ug Lola uban sa usa ka katabang ang mga kauban niya sa balay.

Apan tungod kay kanunay nasakit si Gina sa Canada, maong nakadesisyon ang iyang mga ginikanan nga papaulion siya sa Cebu. Nahiabot si Gina sa wala pa mag-Enhanced

Community Quarentine ang Pilipinas. Apan usa ka semana sukad sa iyang pag-abot sa Cebu, mikatap ang nasakit sa Coronavirus. Maong nia ra mi karon kanunay sa balay, stay at home, kay gipahamtang na man sa gobyerno ang Enhanced Community Quarentine sa tibuok Pilipinas.

Dako ang akong pagtuo nga si Patrick ang gikasulti ni Gina sa selpon. Two years nga nagkarelasyon sila si Patrick ug Gina. Nagsugod ang ilang panaghigugmaay dihang second year high school sila. Klasmet ming tulo sa hayiskol. Daan na ming friends si Patrick ug Gina. Usa ra ka subdivision ang gipuy-an namong tulo. Sa pikas eskina ang balay nila ni Patrick apan di usab kini kaayo layo gikan sa among gipuy-an ni Gina.

Apan dihang nakadesisyon si Gina nga moadto sa Canada, nagkabuwag na sila. Gisakitan kaayo si Patrick sa nahitabo sa ilang relasyon.

Kanunay gisulti ni Patrick nako nga true love gyud ang iyang gibati ngadto kang Gina. Dugay gyud nga naka-move on si Patrick.

Gitabangan ko si Patrick nga makalimot kang Gina. Kanunay ko siyang awhagon nga manuroy mi ug mag-beach, Hangtod nga hilom kong nahigugma kaniya. Nagkasuod na unta kami pag-ayo apan nahibalik si Gina. Ug karon, panagsa na lang motawag ug moteks si Patrick nako sa selpon.

(SUMPAYAN)