Di maglaag
Daghan ang wa magtuo nga seryuso diay ang hulga sa coronavirus disease (Covid) sa Cebu ug sa kinatibuk-an sa Pilipinas. Dihang nangagi ang pipila ka mga turistang Insik dinhi, nagtuo ang katawhan nga di grabe ka mananakod ang mao nga sakit. Apan usa niana ka adlaw, nahigmata kitang mga Sugboanon nga naa na diay sa atong tugkaran ang sakit.
Karon naa nay kapin sa 300 ka mga kaso sa Dakbayan sa Sugbo, sagad nagagikan sa sityo Zapatera, Barangay Luz ug New Cebu City Jail. Sa akong pagsuwat ani, duna na say 63 ka mga piniriso nga positibo sa Covid.
Ingon niana ka mananakod ug ka makahahadlok sa mao nga sakit. Gamay ra tuod ang porsyento sa nangamatay, apan ang ekonomiya maoy grabeng naapektuhan. Ang maayong dagan sa ekonomiya naputol. Ningtibayaw na ang mga negusyante tungod sa kadako na sa nahanaw sa ilang panudlanan sukad gipatuman ang enhanced community quarantine. Karon, gilugwayan pa hangtod sa Mayo 15.
WA MAHADLOK
Daghan ang nag-underestimate sa kagaw sa mao nga sakit. Sa sityo Zapatera lang, bisan nisaka na ang mga kaso, duna gihapoy mga tawo nga wa mahadlok, nagsige gihapon og suroy, way puas sa pagsige og adto sa merkado ug uban pang pampublikong mga lugar.
Kini gung magsige og laag, mas daku ang kahigayunan nga makuha ang kagaw nga mas kuyaw kay gawas nga dali motapot, di pa makita. Unya mas kuyaw kay wa ka lang makahibawo nga nakakuha ka na sa kagaw ug nahimo ka nang carrier, apan wa makahibawo kay symptoms. Unya naa nimo ang imong pamilya nakauban ug uban pang mga tawo.
Kini maoy nahitabo sa sityo Zapatera, diin usa lang ka tawo ang nasakit, apan nakapanakod sa iyang kabanay ug suod nga higala. Gikan sa usa, nanakod, busa nahimong 100 kapin ang mga kaso sa positibo.
Mao gihapon ang nahitabo sa Cebu City Jail. Karon, naa na silay kapin sa 100 nga positibo sa Covid.
MANAGANA
Busa, ang pag-limit sa imong paglihoklihok dako kaayo og ikatabang aron di makakatap ang Covid-19.
Kon mamalit, mas maayong tingbon paghimo aron di magbalikbalik sa publikong mga lugar. Kay dako ang kahigayunan nga naay usa o duha nga naa imong nakauban, apan wa ka lang makahibawo nga naa diay mga positibo sa palibot.