Sugboanong Tillor sa Cagayan na magbase
Gidawat ni Cebuano elite runner Noel Tillor ang tanyag nga full-time coaching job sa Cagayan de Oro City.
Lisod alang kang Tillor ang pagbiya sa iyang yutang natawhan sa Bogo City, Cebu apan dili niya kabalibaran ang talagsaong oportunidad.
Si Tillor nagbasi na sa Cagayan niadto pang Septiyembre sa miaging tuig. Matod sa kanhi Milo Marathon regional champion nga nagtrabaho siya isip usa ka personal running coach ug team coach.
Si Tillor, kinsa kadaghan nahimong men's champion sa Sugbo, maoy naggiya sa DPS Racing Multisports nga adunay 20 ka mga miyembro, kadaghanan triathletes.
Matod ni Tillor nga gihatagan niya og running programs ang iyang mga sakop unya nakig-ayuda sab siya sa mga coach sa swimming ug bike.
Si Tillor, kinsa nakadawat og citation award sa 37th Sportswriters Association of Cebu-San Miguel Beer Cebu Sports Awards sa sayong bahin ning tuiga, mitino nga maayo ang dagan sa iyang kinabuhi sa Cagayan.
Gibutyag ni Tillor nga sa ka dugay na niyang nag-coach, mao kini ang labing dakong tanyag nga iyang nadawat.
Ang pagdagan maoy nakapausab sa kinabuhi ni Tillor.
Kanhi siya drug addict apan iyang nabiyaan kining maong bisyo dihang nagsugod na siya sa pagdagan.
Mao kini ang hinungdan nga bililhon alang kang Tillor ang natad sa paugnat sa kusog nga iyang gikahiligan.
Nanghinaot si Tillor nga ang iyang kasinatian makahatag og inspirasyon sa uban hilabi na sa mga nagumon sa paggamit og ginadili nga druga.
Giangkon ni Tillor nga gimingaw na siya sa ilaha.
Nanghinaot siya nga mahuman na kining hulga sa coronavirus disease 2019 (Covid-19) aron makadalikyat siya sa pag-uli.