Phone app magamit pag-apply sa SAP
Aron mas mahashasan ang pagpangrehistro ug madali ang pag-apod-apod sa emergency cash aid ubos sa Social Amelioration Program (SAP), ang kagamhanan nilusad niadtong Huwebes, Mayo 14, 2020 sa "ReliefAgad" mobile app.
Ang ReliefAgad usa ka paspas nga relief system nga makapadali sa Department of Social Welfare and Development (DSWD) ug local government units (LGUs) sa pag-capture sa Social Amelioration Card (SAC) data ug pagkonektar tali sa electronic payment system sama sa PayMaya, GCash, ug Landbank cash cards.
Pinaagi niini, daling maapod-apod ang hinabang ngadto sa mga beneficiary.
Ma-access kini pinaagi sa reliefagad.ph.
Si Shalaine Lucero, DSWD 7 assistant regional director, hinuon niingon nga di tanan ang makagamit sa app, labina niadtong way smart phone ug stable nga internet connection.
Pagkakaron, ilang gisusi ang mga dapit nga dunay cellular signal ug kadtong wala.
"Daghan tag GIDA (Geographically Isolated and Disadvantaged Areas) diri. In fact, about 30 plus ang among na identify. Pero not only nga GIDA siya nga LGU, naa jud siyay specific nga barangay nga deadspot jud na," pagpasabot ni Lucero.
Si Andrew Ambubuyog, pangu sa DSWD Information and Communication Technology Management Service (ICTMS) Director and National Household Targeting Office (NHTO) , niingon nga usa sa mga kalisdanan nga ilang nasugatan sa pag-apod-apod sa unang tranche sa hinabang nga cash mao ang kakuwang og data sa beneficiary gikan sa LGU.
Kini naglakip sa kuti kaayong pagkolekta ug pag-encode sa impormasyon sa beneficiary ug pag-report sa listahan ngadto sa DSWD.
Apil na niini ang manual nga cash distribution nga nakapalangay og samot sa paghatag ngadto sa low-income nga mga panimalay.
Sa naandang mga pamaagi sa pagrehistro, siya niingon nga ang mga beneficiary mofill up sa SAP form ug i-submit ngadto sa barangay dayon ngadto sa LGU.
"Ito po yung problem, LGU will enter data to the system. So, we wanted to get a portion of this encoding through the digital flow," siya nagkanayon.
Gamit ang gi-fill up nga SAC form, ang beneficiary maka-scan sa bar code ug mosuwat og form gamit ang ReliefAgad ngadto sa mobile app.
Gamit ang smart phone, ang beneficiary mahimong moclick sa browser ug mo-type sa URL. Direktahan dayon siya ngadto sa app.