ECQ malibkas kaha?

Daghan na karong nahinamhinam samtang nagpaabot nga malibkas na kining enhanced community quarantine (ECQ) sa dakbayan sa Sugbo karong Mayo 31, 2020, tulo ka adlaw gikan karon.

Sa interview sa mga tigbalita, si Cebu City Mayor Edgar Labella wala mosalikway sa posibilidad nga kini malibkas na tungod sa nagkadaghang recoveries ug nagkagamay na usab sa kaso sa infections sa coronavirus disease (Covid-19).

Pero sa samang higayon, iyang gipadayag nga magdepende ra usab kini sa recommendation sa Interagency Task Force on Emerging Infectious Diseases (IAFT-EID).

Buot ipasabot, nga kon sa dakbayan sa Mandaue gipangandaman na og maayo ang ilang pagpaubos na sa general community quarantine (GCQ) sugod karong Hunyo 1, ang dakbayan sa Sugbo, ilabi na ang mga negusyante, dili pa kasiguro ug dili pa usab makahunat sa ilang pagpangandam.

Malaumon si Labella ug nanghinaot nga magpadayon ang trending sa pagsaka sa mga recoveries ug ang pag-us-os sa mga infected cases.

Ang Cebu City napaubos sa ECQ niadtong Marso 28, 2020 ug motapos unta niadtong Abril 28. Tungod sa nagsaka nga kaso sa coronavirus giuswag kini sa Mayo 15 apan giusban kini sa pag-inat sa Mayo 31 tungod sa padayon nga pagsulbong sa mga nataptan.

Pero niadtong Dominggo, ang grupo sa mga scientists sa University of the Philippines (UP) ang mibutyag nga ang Cebu City uban sa National Capital Region (NCR) gikonsiderar gihapon nga mga high risk area sa coronavirus disease.

Gani miawhag kini sa national government nga ipadayon ang hugot nga pagpatuman sa mga restrictions. Ilang gipasabot nga mius-os na ang kaso sa infections sa Covid-19 apan taas gihapon ang gidaghanon niini.

Dili kaha kini maoy makapa-uswag na usab sa ECQ sa Cebu City?