For you, no more
Wa ko mahimutang. Nahasol na nuon ko karon. Karon pa man gud mahitabo nga nagpakitag concern si Nymfa nako. Di man gyud mi suod nga manag-agaw. Apan kalit siyang nakigsuod nako karon.
Anang pagka ugma stay at home gihapon ko bisan GCQ na ang among lugar. Unsaon man gud, puwerteng inita sa panahon.
Kanunay kong magpalabay sa oras sa among lawn.
Maglingkod ko sa lingloranang kawayan ubos sa landong mansinitas. Hayahay ang maong lugar tungod kay gawas sa kahoy nga mansinitas sa among lawn, duna pay laing mga kahoy sa palibot sa among balay.
Unya nakatan-aw ko sa babaye nga bag-ong nahiabot ug nagtindog sa gawas sa among gate. Ang akong best friend. Mitindog ko ug mipaingon sa among gate. Giablihan ko ang pultahan.
“Unsa na man say imong ibalita nako ron, Rose?”
Way tingog nga misulod si Rose sa among lawn. Gidala ko siya sa lingkoranang kawayan nga nahimutang ubos sa landong sa mansinitas.
“Mitawag si Rodney nako sa selpon kagabii. Motuo kag di, Mercy, naghilak siya.”
“Unsa na man sab ning klaseha sa drama, Rose?”
Nangyamiid ko. Si Rose ang gihimong taytayan ni Rodney kaniadto diri nako.
“Mag-bearer ka na sab sa kanahang dako, Rose? Na, kon buhaton nimo na, maputol na gyud ang atong pagka amiga. Nakahibawo bitaw ka nga nasuko kaayo ko kang Rodney tungod sa iyang pagbudhi nako?”
“Sa iyang sulti nako, Mercy, nagbinuotan siya sa inyong relasyon.”
“Di na ko niya mailad, uy, Rose!”
Nataas ang akong tingog. “Bisan nasuko ka niya, Mercy, pero isulti ko pa gihapon nimo ang iyang gitug-an nako. Tumu-tumo ni Nymfa ang iyang giingon nga dunay uyab si Ridney sa Mandaue aron masuko ka sa imong boyfriend ug makigbuwag ka niya. Maoy sulti ni Rodney nako nga sukad lang nga nagkaila sila si Nymfa kanunay kining moteks ug motawag niya. Kanunay manghagad nga magkita sila.”
Nakalitan ko sa akong nadungog. Unya nakahinumdom ko nga nangayo si Nymfa nako sa number ni Rodney.
(SUMPAYAN)