Ang mga kabilin
Manlalaban ako, corporate lawyer sa dagkong mga kompaniya ni Don Alfonso Buenceso. Diversified ang iyang mga patigayon ug industriya, ug maisip nga mga multi-national. Ilado siya sa tibuok kapupud-an ug sa tibuok kalibutan.
Biyudo si Don Alfonso, kapin na sa lima ka tuig nga mitaliwan ang iyang minahal
nga kapikas sa kinabuhi. Buot na siyang mahiuban sa
iyang asawa sa laing kinabuhi. Mao nga gihinayhinay niya sa pagpadumala ang tulo niya ka anak nga lalake sa lainlain nilang mga patigayon ug industriya. Ang mautukon niyang mga anak nga sila si Rene ug Marco nagdumala sa nag-unang mga kompaniya sulod ug gawas sa nasod. Ang giingon nga hinay ang pangutok naghupot lang sa gagmayng mga patigayon ug industriya ug kasagaran anaa lamang sulod sa nasod. Gidumala
kini ni Ramil nga mahiligon sa pagpanguma ug sa pagpamuhig kahayopan.
Miabot ang panahon nga nanamilit na si Don Alfonso sa iyang mga anak. Human siya itunod sa iyang lubnganan, nakig-atubang ako sa iyang tulo ka anak nga lalake. Gibasahan ko sila sa katapusang mga testamento sa ilang amahan. Wala malipay ang duha ka mautukon nga mga anak. Nakiglalis sila kanako.
Apan mitingog ang giingon sa duha ka igsuon nga labing bugo sa pamilya, si Ramil, nga dili gusto sa mga kabilin sa ilang amahan. Moangkon lang siyag gamayng yuta sa usa ka lalawigan diin ang unang mga negusyo sa ilang pamilya nagsugod. Gusto si Ramil nga manimuyo nga malinawon uban sa iyang pamilya. Naminyo si Ramil sa usa ka babaye nga kaliwat sa mga kabos. May napulo siya ka anak.
Midali pagbiya si Ramil sa among atubangan, malipayon siyang gisugat sa iyang pamilya.
Nahibilin sila si Rene ug Marco nga nahigangha. Nahikatawa ko sa hilom. Si Ramil mao ang gibinlan sa dagkong mga kompaniya kay ang testamento nag-ingon nga si Ramil hinay og pangutok ug kinahanglang makasunod sa mga katigayunan nga kinadakan kay dili kini makamaong mopadako ug tudloan na lang sa pagmentinar niini.
“Rene, Marco, kamo ang gibinlan sa gagmayng mga patigayon ug industriya kay mautukon kamo ug may dakong kahigayunan nga inyo kining mapadako ug mapalapad sa umaabot. Kaluy-an kuno ninyo ang inyong igsuon nga pobreg hunahuna.” Mao kini ang gipasabot ko sa duha ka mautukon nga mga anak. Nagpanglingo ug nagkatawa ang duha ka magsuon.
Mitingog si Rene, “Buanga na hinuon niini. Nakasabot na kadtong bugong dako nga si Ramil. Naglikay kadtong mopas-an sa gibug-aton sa dagkong mga kompaniya. Buot makalingkawas. Kami ang papas-anon sa tanang mga gibug-aton.”
Mitingog usab si Marco, “Pareho kaming gidisiplina sa among inahan. Nagatambag siya kanamo sukad pa sa among pagkabata nga ang tinuod nga kalipay sa kinabuhi anaa sa simpleng paningkamot. Nagpabugo-bugo kadto si Ramil aron makalikay sa isog ug harianon nga mando sa among amahan."
Labi pang nahikatawa ako sa hilom kay nasayod na ako sa sinugdanan kon si kinsa si Ramil.
(KATAPUSAN)