GIPA-SOCIAL DISTANCING NASUKO, TINDERA GIPATAY

Negusyante wa makapalit sa iyang paboritong pandesal, nipusil patay sa tindera nga iyang gikalalis kay gimandoan siyang molinya ug mosunod sa social distancing.

Nagkagubot ang mga tawo nga naglinya dihang gipusil ni Basilio Cabajar, 41, si Jeserel Farra, 22, sud sa Shiroge Bakeshop, sa highway sa Barangay Santa Cruz-Santo Nino, lungsod sa Balamban, Sugbo alas 4 sa hapon, Mayo 28, 2020.

Si Farra namatay diha-diha sa usa ka samad sa dughan.

Si Cabajar taga sityo Ibo, Barangay Pondol, Balamban, lumad nga taga Sudlon, Dakbayan sa Sugbo.

Si Cabajar, kinsa gihulagway nga hubog, mopalit unta og pandesal nga dunay sagol nga kamunggay kay iya kining paborito, matod ni Police Staff Sergeant Ronald Balimbing sa Balamban Police Station dihang nahinabi sa Superbalita Cebu.

Si Farra nitambag kang Cabajar sa pag-apil sa linya ug motuman sa social distancing.

Apan nasuko na hinuon si Cabajar, nagkalalis sila ni Farra.

Si Cabajar nipauli, nibalik nga nagdala na og pusil ug gipusil si Farra, kinsa busy sa pag-atiman sa mga kustomer.

“Suko daw kaayo ning suspetsado nga gibadlong, kay gusto sa tindera dili mosalot sa linya kay daghang nag-unang kustomer, unya hubog. Gusto na siya mokaon sa paboritong pandesal, naalburoto, namusil,” matod ni Balimbing.

Si Balimbing niingon nga si Cabajar nailhan sa ilang lugar nga maldito, pun-an pa nga hubog.

Wa na nila makuha ang kalibre .45 nga pistola nga gigamit sa pagpusil kang Farra.

/ TAMPO SA BALAMBAN POLICE STATION GIPUSIL. Si Basilio Cabajar (sukip nga hulagway), mopalit unta og pandesal nga iyang paborito bakery sa lungsod sa Balamban, Cebu dihang iyang gikalalis ang tindera kay gipalinya siya. Sa iyang kalagot, niuli siya, nikuha og pusil, nibalik ug gipatay ang tindera.