23 ka Covid-19 patients sa Lapu gipahiluna sa isolation center

Moabot sa 23 na ka mga asymptomatic nga pasyente sa coronavirus disease 2019 (Covid-19) sa dakbayan sa Lapu-Lapu ang gipahimutang sa isolation center nga mao ang Lapu-Lapu City College sa Barangay Gun-ob.

Mao kini ang gikompirmar ni Nagiel Bañacia, ang hepe sa City Disaster Risk Reduction Managment Officer (CDRRMO) sa dakbayan.

Matod ni Bañacia, ang maong mga pasyente nagsugod nga gipahimutang sa isolation center niadtong Mayo 17.

Labing bag-ong napahimutang sa naasoy nga isolation facility mao ang 4 nga positibo sa Covid-19 sa Biyernes, 29, nga taga Abuno, Barangay Pajac; taga La Aldea Beuna Mactan, Timpoloc, Barangay Babag; taga Masulog, Barangay Basak; ug taga Barangay Pajo, sumala ni LapuLapu City Mayor Junard Chan.

Sa 23 ka tawo, duha ang mokompleto na sa ilang 14 ka adlaw nga pagkalain karong semanaha. Ipaubos sila pagbalik sa swab test aron masuta kun aduna pa ba silay Covid-19 o wala na.

Ang ubang symptomatic nga pasyente sa Covid-19 anaa gipahimutang sa ARC Hospital sa dakbayan ug ang uban anaa sa Vicente Sotto Memorial Medical Center (VSMMC).

"Naay uban problema sa kidney, nag-dialysis na mao tua sa Sotto ang naa (nga isolation center) katong mga way symptoms ug himsog gyud, every after 14 days mag test," matod ni Bañacia.

Padayon karon ang pahimangno usab ni Chan sa mga Oponganon sa permanenteng pagtaptap sa baba ug ilong gamit ang face mask kung mogawas sa panimalay.

Siguroon usab nga manghugas kanunay sa kamot gamit ang sabon o alcohol ug himuon ng tradisyon nga limpyohan ug trapohan ang mga butang nga kanunay mahikapan.

Ug labaw sa tanan, ang kanunay usab nga pagtuman sa physical distancing ug likayan ang pagsikitsikit hilabi na kun mogawas sa panimalay.