Gutom na, trabaho nata
Nagdugo ang ekonomiya. Gigutom ang mga mamumuo. Giapas sa mga bayrunon ang mga negosyante. Sa makabalik pa og trabaho panahon na nga mamalik na og trabaho taliwala sa mga kabalaka ning panahon sa pandemic. Subay niini, gusto na kong balikan kadtong asoy sa usa ka higalang Human Resource manager sa kalidad sa pipila sa ilang trabahante. Matod niya nga sa mangaplay pa og trabaho, magpaluoy luoy. Kay nangita lage og job. Sa dihang nadawat na sa giaplayan, way ayo kay di man sab jab-bon.
Ang rason tapulan, ligoy, absinot ug way plano sa kinabuhi. Patuga tuga og apply nga di man diay trabaho ang tuyo. Sa mga nagdumala og patigayon, komon kaayo ni nga problema. Sa adlaw nga nagkinahanglan ka sa serbisyo sa imong tawo, di sab ka tungahon. Absent. Ang rason balik balik lang. Gihilantan, sakit ang ulo, sakit ang ngipon, sakit ang tiyan, nagkalibanga ug bisan unsa na lang. Puyra lang sa nagsulti sa tinuod. Sa sitwasyon nato karon, kinahanglan nga magdayganay ang mga mamumuo ug employer. Magsabot sa way pagduha duha unsaon nga mapabalik ang kabaskog sa negosyo human sa pipila ka buwan nga pagpanira tungod sa coronavirus nga padayong nanghudlat sa katawhan.
Pasabton sa mga employer ang mga mamumu-o basin sa guidelines nga giluwatan sa gobyerno, ilabi na ang Department of Labor (DOLE). Naay daghang guidelines nga giluwatan ang DOLE nga posibling wa pa masayri sa mga empleyado, nunot sa pagbukas og balil sa negosyo human kini manirado. Para nako, mao ni labing importanting gimbuhaton, kining gitawag og magsinayranay, magsubayay ug magklarohay.
Nahinumdum mo sa sugilanon ni Ikang Diaz? Kadtong inahan nga taga Isla Verde, Inayawan Cebu City ug may siyam ka mga anak uban sa iyang ka live in nga usa ka PUJ driver? Human niya giasoy ang iyang kapaitan, nag-abot abot ang mga ayuda. Sama sa bugas ug de latang pagkaon. Usa ka donor sa Tipolo, Mandaue City nga di magpahingalan, usa ka sakong bugas nga ganador iyang gihatag. Tungod sa ECQ, ang mga pulis sa Mandaue City nay nikarga sa bugas padung sa Cebu City. Salamat kang Maj. Mercy Villaro, ilang PIO, sa pagsanong sa atong hangyo. Pinaagi sa pagtugot sa ilang direktor nga si Col. Jonathan Abella, gihatod ni PEMS Jonas Paquibot, chief clerk sa Mobile Patrol Group, sa Camp Sergio Osmeña Sr. Gikan didto gikarga sab sa iyang sakyanan ni Police Lt. Sherwin Abellare ang ayuda hangtod nga naabot kang Ikang. Sa donor sa bugas ug sa PNP, daghang salamat. Salamat sab kang Boss Manny Lugo sa iyang ayuda para gihapon kang Ikang.
Nagdugo ang ekonomiya. Gigutom ang mga mamumuo.”