For you, no more

Pagka ugma sa hapon, as usual nagpalabay ko sa oras sa among lawn. Nagkalingaw kog duwa-duwa sa akong selpon samtang naglingkod ko ubos sa landong sa mansinitas.

Unya, nakamatikod ko nga dunay tawo nga nagtindog sa gawas sa among gate nga rehas. Kalit nga mikuba ang akong dughan. Si Rodney ang nahiabot. Seryuso siyang nagtan-aw nako.

Mitindog ko. Giduol ko si

Rodney. Giablihan ko ang pultahan sa among gate. Nagpabiling nagtindog si Rodney sa gawas sa gate. “Sulod.”

Mao ra kini ang akong gisulti. Hapit di gani ko motan-aw kang Rodney. Mibalik kog lingkod sa lingkoranang kawayan nga gilingkoran ko ganina. Nagtindog si Rodney sa akong atubangan.

“Nakasabot ko nimo, Mercy, kon nganong nasuko ka pagayo nako. Mianhi ko aron ipabasa ko nimo ang mga teks ni Nymfa nako.”

Nagkurog ang akong kamot nga midawat sa selpon ni Rodney nga iyang gitunol nako. Gi-ready na niya daan ang mga teks sa akong cousin ug ang iyang tubag.

“Sige na, Rodney. Magkita ta. Sukad lang nga nagkaila ta, ikaw na kanunay ang akong gihunahuna. Na-love at first sight ko nimo.”

Mikurog ko sa kalagot sa akong nabasa. Gibasa ko ang replay ni Rodney.

“I love Mercy very much, Nymfa. Di ko makahimo sa pagluib niya.”

Gibasa ko pa ang ubang mga text messages ni Nymfa para kang Rodney. Pulos love ang message sa akong cousin ngadto kang Rodney. Nabasa ko sab ang ubang mga replay ni Rodney ngadto kang Nymfa. Pulos balibad ang tubag ni Rodney. Kanunay niyang gihisgotan ngadto kang Nymfa nga love kaayo ko niya.

Unya, gibati ko ang dakong kauwaw ngadto kang Rodney dihang giuli ko kaniya ang iyang selpon.

“Sige, Mercy, mopauli na ko." Wa ko katubag nga misunod pagtan-aw kang Rodney nga mibiya na kanako. Apan wa pa gani makagawas si Rodney sa among gate, giagpas ko siya. “Rodney!”

Dihang nahiduol na ko kang Rodney, migakos kog hugot kaniya, ug naghilak kong nangayog pasaylo kaniya. Migakos sab og hugot si Rodney nako. Nabatyagan ko ang pinitik sa gugma sa iyang kasingkasing.

(KATAPUSAN)