‘Panimawos’ motibo sa pagpatay

Pagpanimawos maoy gituohan sa kapulisan nga motibo sa pagpusil patay sa lalakeng natulog sa iyang payag sa sityo Lutaw-Lutaw, Barangay Santo Nino, Dakbayan sa Sugbo sa pasado alas 10 sa gabii, Mayo 28, 2020.

Si Police Senior Master Sergeant Erasmo Rosel sa Waterfront Police Station niingon nga naila lang sa alyas nga Candle Light ang biktima, anaa sa 30 anyos ang edad.

Dugang ni Rosel nga si Candle Light, sa ilang nasayran, lumad nga taga Carcar City ug namaligya og kandila sa Basilica Minore del Santo Niño.

Si Candle Light nakaangkon og upat ka mga samad pinusilan sa agtang nga miresulta sa iyang hinanaling kamatayon.

Matod ni Rosel nga ang gunman naglakaw padung sa payag dayon nipusil ni Candle

Light nga natulog.

Human sa pagpusil, nisakay kini sa usa ka motorsiklo nga nagpaabot.

Samtang sutaon usab sa Waterfront Police Station kon duna bay kalambigitan ang pagpamusil nianang buntag sa samang barangay diin usa ka alyas Ethyl ang gipusil patay samtang natulog.

HUBOG

Sa laing bahin, naangol ang usa ka lalakeng hubog human pusila sa iyang kainom sa sityo Sudlon, Barangay Lahug, Siyudad sa sugbo.

Ang biktima nga si Raffy Espinosa, 38, natapsingan sa iyang tuo nga abaga.

Si Espinosa nangangkon nga kalit siyang gipusil sa iyang kainom, apan wa siya makaila.