PBA MAGPAUBOS SA COVID-19 TEST SA DI PA MOBALIK

Tanang mga trabahante sa Philippine Basketball Association (PBA) gikan sa Commissioner's Office ngadto sa security personnel ipaubos sa Covid-19 test karong adlawa, Sabado, Mayo 30, isip pagpangandam alang sa pagbalik sa aksyon sa liga.

Sa dili pa mobalik ang kombati sa PBA, unahon una niini ang pag-disinfect ang ilang opisina sa LIbis, Quezon City ug sa mga venue.

Sa Lunes, Hunyo 1, 2020, ikanaog na ang enhanced community quarantine (ECQ) ngadto sa general community quarantine (GCQ) ang Metro Manila

Inig gawas sa resulta sa Covid-19 test, hayan magsugod na dayon sa pagtrabaho ang mga trabahante sa PBA.

“Of course, we're hoping everybody's negative and that we can all go back to attend our duties - full force by June,” batbat ni PBA commissioner Willie Marcial.

Sa pagkanaog sa National Capital Region (NCR) ngadto sa GCQ, nanghinaot ang PBA nga maluwas pa nila ang ilang 45th season. Ang PBA executives makigtambayayong sa gobiyerno alang sa mga tulomanon nga ilang ipatuman atol unya sa ilang pagbalik.

Basi sa inisyal nga resolusyon sa Inter-Agency Task Force, ang mga atleta sa individual sports mahimo nang makabalik sa ilang tagsatagsa ka tahas sa GCQ.

Kini naglakip sa running, biking, golf, swimming, tennis, badminton, equestrian ug skateboarding.

“This makes us optimistic that our teams can be allowed to return to the gym for individual workouts by shift,” pasabot ni Marcial.

Ang board of governors sa PBA naghugpong niadtong Miyerkules diin gihinayhinayan na nila paghan-ay ang mga lagda nga ilang ipatuman.

Gipaneguro sa PBA nga nahiuyon kini sa mga lagda nga ipatuman sa gobiyerno.

Sama sa ubang mga torneyo, naundang ang mga duwa sa PBA niadtong Marso ning tuiga dihang mikuyanap na og grabe ang Covid-19.