WAY FACE SHIELD, WAY SAKAY: DOTR
SA AGOSTO 15 IPATUMAN NGADTO SA PASAHERO SA PUBLIKONG SAKYANAN
Sugod sa Agosto 15 ang tanang pasahero nga mosakay sa mga publikong sakyanan gikinahanglang magsul-ob og face shields.
Kini human nga ang Department of Transportation (DOTr) ang miluwat og Memorandum Circular 2020-014 nga nagmando sa mga nangulo o opisyal sa transportation sector sa pagpatuman sa maong memo ngadto sa ilang tagsa-tagsa ka mga hurisdiksiyon.
Samtang ang Cebu Port Authority (CPA) mopatuman na sab sa “No Face Shield, No Ride” policy ngadto sa tanang pasahero moluwan og barko sugod karong Agosto 7 sigun sa kamanduan nga giluwatan sa Maritime Industry Authority.
Gawas sa naunang gipatuman sa minimum health standard sama sa kanunayng pagpanghugas og kamot, pagsul-ob of mask ug ang physical distancing, gikinahanglan na ang pagsul-ob og face shield ilabi na nga mosakay sa mga publikong sakyanan.
Samtang si Land Transportation Office (LTO) 7 Director Victor Caindec niingon nga gapaabot nalang siya sa “specifications of of the order” gikan sa operations division sa ilang buhatan.
Kini aron nga kahatagan og katin-awan ang publiko ilabi na ang “rules and regulation” sa higayon nga hingpit nang ipatuman sa LTO ilabi na sa mga posible nga penalties o silot nga ipahamtang ilabi na niadtong maatlan nga way face shield o ang wa pagtuman sa maong kamanduan.
“What are the possible penalties? It could be that it will be charged under reckless driving, etc. LTO will now translate the intricacies of that order. One of the things that we take pride in Region 7 is that we do not do anything without proper documentation of order,” pasabot ni Caindec.
Base sa listahan sa Land Transportation Franchising and Regulatory Board-Central Visayas nga sa tibuok rehiyon adunay 650 ka bus units, 130 modern public utility jeepneys (PUJ), 3,000 ka taxi, 300 transport network vehicle services units, 150 UV express units ug 39 ka traditional PUJs ug 400 tourist transport service nga gigamit nga shuttle nga adunay special permit to operate.
REAKSIYON
Sa susamang kalambuan, niani og nagkadaiyang reaksyon gikan sa mga pasahero kalabot sa “”No Face shield, No Ride” policy ngadto sa mga pampublikong transportasyon.
Si Quennie Case, taga Cabancalan, Dakbayan sa Mandaue, nga nahinabi sa Superbalita Cebu kinsa nagpa-abot og bus uyon sa maong polisiya.
Gani, bisan wa pa ang pandemya, permanenti na siyang magsul-ob ug mask isip proteksyon sa abog ug karon anad na sab siya sa pagsul-ob og face shield sa higayon nga mogawas aron dugang proteksyon batok sa Covid-19.
Dugang ni Case nga pinaagi sa maong polisiya adunay doble nga proteksyon labi na inig sakay sa pampublikong transportasyon nga adunay daghang manakay.
Ang laing pasahero nga si Susan Samblaseno, Barangay Canduman, Mandaue City niingon nga tungod kay wala siyay mahimo kon ipatuman na ang maong balaod, motamod nalang siya.
Sumala pa nga kanunay siyang mosakay og bus gikan ug paingon sa ilang balay sa higayon mopaingon sa Centro.
Nakasabot ra sab si Samblaseno sa katuyoan sa maong palisiya aron mapanalipdan ang ubang pasahero sa pagkatap sa virus. Sa kaso ni Marilyn Panjay, manindahay og prutas nga taga-Barangay Canduman ang dili uyon.
Bisan kung wala siyay mahimo kon hingpit na kining ipatuman, buot niyang ipa-abot sa gobyerno ang maong desisyon ilabi na nga dili tanan ang makapalit og face shield.
Giingon niya nga ang mga face shield makadugang ra sa ilang mga gasto tungod kay kinahanglan niyang palitan iyang kaugalingon ug iyang bana nga kanunay nga kauban niya sa ilang tindahan sa prutas.
Matod niya, tungod anaa ilang tindahan sa ikaduhang andana sa Mandaue City Public Market dili kaayo sila maadto sa mga mamalitay.
“Wala na gani mi kita mopalit pa gyud mi ana (face shield),” matod pa ni Panjay ug alang niya igo na ang face mask nga makapanalipod aron di matakdan sa virus.
Sa laing bahin, adunay daghang gibaligya nga face shield sa mga mall ug gani ang uban anaa sa online.