PHILHEALTH GIKAWATAN OG P15B SA 'MAFIA'

Ang kanhi kawani sa Philippine Health Insurance Corp. (PhilHealth) Thorrsson Montes Keith nisulti sa Senado, Martes, Agusto 4, 2020, nga dunay “mafia” nga nikawat sa P15 billion gikan sa kompaniya sa gobyerno.

“Naging kultura na po nito ay ang pagtatalaga ng mga sindikato o ‘mafia’ ng kanilang kasamahan, kasabwat, o kapwa sindikato sa mga matataas na posisyon na nakakatulong sa kanilang iligal na operasyon,” sulti ni Keith sa Senate committee of the whole, nga nilusad og imbestigasyon sa giingong kurapsyon sa PhilHealth sa Martes.

Matod ni Keith, si PhilHealth president ug CEO Ricardo Morales makausa nihangyo kaniya nga pakigsultihan si Presidential Anti-Corruption Commissioner (PACC) Greco Belgica aron mahilot ang kase sa overpriced Covid-19 testing kits.

“May pagkakataon na inutusan ako ni Morales na puntahan ko si PACC Commissioner Greco Belgica para hilutin ang kaso ng overpriced Covid-19 testing kits. Inayawan ko po ito,” siya niingon.

Si PhilHealth board member Alejandro Cabading nisaksi usab batok kang Morales, sa pag-ingon nga nisuporta siya sa proposed supplemental budget sa pagpalit og overpriced ICT (information and communications technology) sa Abril.

Si Cabading nipakita sa overpriced items nga itandi sa balor nga giuyonan ubos sa information system plan sa Department of Information and Communications Technology, nga mao ang mosunod:

Adobe Master Collection software - P21 million itandi sa giuyonan nga balor nga P168,000; Application servers and licenses - P40 million itandi sa giuyonan nga gahin nga P25 million; Structured cabling - P5 million itandi sa giuyonang gasto nga P500,000; Identity Management software - P42 million itandi sa giaprobahang gasto nga P20 million; Office Productivity Software - P21 million itandi sa giaprobahang gasto nga P5 million; ug Application servers and virtualization licenses - P25 million itandi sa giaprobahang balor nga P14.8 million.

Si Cabading niingon nga duna say P734 million nga balor sa items sa proposed budget nga wa sa giaprobahang plano sa DICT.

Siya nipasangil nga duna say pagsuway sa pagmugnag kalibog pinaagi sa “splitting one item into two” ug nilista og nagkadaiyang descriptions.

“I tried to find a solution by raising this with management, but the most frustrating part is it seems that management seems to be tolerating this act,” matod ni Cabading.

Niadtong Hulyo, ang Commission on Audit (COA) nitaho nga ang budget alang sa lima ka ICT items, nga naglakip sa computers, scanners ug ubang items, gi-overpriced og P98 million.

Si Morales nanalipod sa ahensya sa pag-ingon nga ang tanang healthcare systems sa kalibutan di libre sa pagpanglimbong.

“Kahit linggo-linggo tayong magpalit ng presidente, hindi ho mawawala ang problemang ito. There is no healthcare system in the world that is entirely fraud-free,” matod ni Morales.

Siya nidugang nga ang “negative publicity” sa PhilHealth wa makatabang sa ahensya sa pagbuhat sa iyang trabaho.

“We are here again at the `annual bash PhilHealth frenzy’.

Tulungan ho natin ang PhilHealth. Kung maaari ho, wag pagtulungan,” nagkanayon si Morales.