SAF i-pull out

Mga sakop sa Special Action Force (SAF) nga gidugang sa dakbayan sa Sugbo niadtong Hunyo 29 tungod sa pagsaka sa kaso sa Covid-19 ang mobalik na sa National Capital Region Police Office.

Giduaw ni Police Brigadier General Albert Ignatius Ferro, direktor sa Police Regional Office (PRO) 7, aron pasalamatan sa ilang serbisyo sa Sugbo sulod sa 35 ka adlaw nga pagpatuman sa estriktong minimum health standard sa tibuok dakbayan.

Kini nunot sa gikatakdang pag-pull-out sa mga sakop sa SAF troopers sa wa pay ang Agusto 15 ug ibalhin sa NCRPO.

Matod ni Ferro, tungod sa sitwasyon sa Metro Manila nga misaka ang ilang kaso sa Covid-19 ilabi nga nga gibalik sila ngadto sa modified enhanced community quarantine MECQ gikihanglan ang ilang presensya sa maong lugar.

Una nang mihangyo ang PRO-7 sa Camp Crame nga ipabilin lang una ang SAF sa dakbayan bisan pa man nga gipaubos na sa general community quarantine ang tibuok siyudad.

Agosto 3, nitugot na si PNP Chief Police General Archie Francisco Gamboa unang mitugot sa maong hangyo, apan mimando na usab kini nga ipa-recall aron ipadala sa NCRPO.

Giangkon ni Ferro nga dako og natabang ang mga sakop sa SAF sa pagpatuman sa kahusay ug kalinaw, ilabi na sa pagbadlong ug pagdakop niadtong mga tawo nga wala motuman sa health protocols.

Mipasalig si Ferro nga dili maka-apekto sa nagpadayong pagpatuman sa estriktong lagda sa general community quarantine ang pagkuha sa SAF dinhi sa Sugbo tungod kay paigo pa ang kapulisan nga maoy gitahasan nga mobantay sa quarantine checkpoints.

“We could manage the situation in Central Visayas particularly in Cebu, because we have established what is necessary with the contact tracing operation center is there,” dugang pa sa opisyal.

Daghan man tuod nga mireklamo sa pag- abot sa SAF sa Sugbo tungod sa ka-estrikto niini sa pagpatuman sa lagda sa Inter-Agency Task Force apan aduna say nakadayeg.