Stay beside me

Milabay ang laing mga adlaw. Dunay mga higayon nga makita ko si Carlo nga mag-barbel labi na kon buntag sa ilang lawn. Dagko siyag mga braso ug nakapasamoit sa iyang ka-macho. Nagdung-aw ko niya sa among terrace. Mitan-aw siya nako. Miwara-wara siya sa iyang kamot ug nindot kaayo siyag smile. Gibaslan ko sab siyag wara-wara sa akong kamot.

Unya usa ka buntag ana nga

nanilhig ko sa among lawn, nakita ko si Lorna nga nahiabot. Gisugat siya ni Carlo sa ilang gate. Malipayon silang duha nga nanulod sa lawn. Nahibulong gyud ko. Morag suod kaayo silang duha.

Usahay gani mohapak si Lorna sa bukton ni Carlo. Na, nagdako gyud ang akong gibating selos kang Lorna. Nahunahuna na nuon nako nga tingalig nagkahinigugmaay sila ug ila lang kining gihilom?

Pagka gabii gitawgan ko si Carlo sa selpon. Naghigda ko sa kama sa akong kuwarto.

“Uy, morag importante ang imong tuyo nako, da, Jeanette? Gabii na gud ron ug nanawag ka nako.”

“Di man matawag nga importante gyud, Carl. Mangumosta lang ko nimo ug ni Lorna?”

“Okey ra man ko, Jean. Pero nganong naapil man si Lorna?”

“Nakita ko man gud kamong duha ganinang buntag nga malipayon.”

“Aw, ingon gyud mi ani, Jeanette. Way malisya ang among kamalipayon. Simple lang, friend mi.”

“Aw, mao ba? Ipaila sab ko kang Lorna aron magkasuod sab mi. Gusto nako nga ang imong friend, friend sab nako.”

“No problem. Ipaila-ila ta mo sa usag usa.”

Ug miabot ang adlaw sa giingon ni Carlo. Diha ko sa among lawn ug gitawag ko ni Carlo. Diha diay sa ila si Lorna. Malipayon si Lorna nga nagkaila mi.

“Biyaan ta mong duha kadyot, ha, kay magkuha kog atong mainom.”

Hapt mi magkadungan og tando si Lorna. Diha mi sa lawn nila ni Carlo duol sa hardin.

“Kanunay kang hisgotan ni Carlo nako, Jeanette. Guwapa kuno ka, buotan ug kasaligan.”

Hilom kong nalipay sa pagdayeg ni Caro nako ngadto kang Lorna. Unya nakita nako ang kamaayo ni Lorna. Gusto kong makahibawo gikan mismo ni Lorna kon unsa ang real score nila ni Carlo.

(SUMPAYAN)