CYT mipadayon sa ilang adbokasiya
Gipahingusgan sa Cebu Young Talent (CYT) ang pagpadayon sa adbokasiya aron pagtabang sa mga batan-ong Sugboanon nga mapakita nila ang ilang nagkadaiyang talento bisan pa man sa krisis nga giatubangan nato karon.
Ang CYT malampuson nga nipatuman sa mga nagsunodsunod nga online pageants nga usa kini ka alternatibo nga paagi kay dili pa pwede ang physical contact sa on-the-ground activities ug pageants.
Ang online activities ug online tournament adunay di mominus 500 ka batan-on ang nakaapil.
Kauban sa CYT ang Globe Telecom, Park & Brew Restaurant ug Cebu Original Lechon Belly sa mga sunodsunod nga kalihukan.
Gipatuman karon ang Mobile Legends Tournament Season 2 diin dunay 20 ka teams og 5 players per team. Malampuson usab nahuman ang Season 1 niaging buwan.
Sa miaging buwan, gikoronahan sa CYT ang mananaog sa Mister and Miss Bisaya Rising Influencer nga sila ni Lindsey Johanna ug Alwyn Avenido nga lumad taga Naga City, Cebu.
Gikoronahan usab ang mga mananaog sa Bidaman Cebu nga sila Chris Glyde Indiola nga taga Argao, Cebu ug Chris Gabriel Ravina nga taga LapuLapu City.
Gitakda usab karung buwana ang selebrasyon sa CYT para sa ilang International Youth Day Celebration diin ipahigayon ang Cinebuano QuaranFilm Festival nga dunay 8 ka team participants gikan sa Argao, Carcar, Naga, San Fernardo, Cebu City, Mandaue City, Lapu-Lapu og Danao City.
Ipagawas ang mga short film entries sa maong participants Agusto 23-29, 2020 via CYT Official Page.
Ang tanan mananaog makadawat og mga premyo gikan sa sponsors sa kalihukan.
“Dako kaayo naku nga pasalamat sa Ginoo, sa mga partners ug sponsors nato nga padayon nitabang og nisalig aron atong mapatuman ang atong mga kalihukan miskan paman sa kalisod sa sitwasyon. Usa kini ka paagi aron mahatagan nato og kalingawan, higayon nga mapakita sa mga batan-on ilang mga talento og lugar aron malikay nato sila sa mental health issues,” matod ni Johndro Sabuero, managing director sa Cebu Young Talent.