LAKERS, WEST NO.1
Naseguro nang daan sa Los Angeles Lakers ang No.1 seed sa Western Conference human nila gipangbuntog ang Utah Jazz, 116108, kagahapon sa 2019-20 National Basketball Association (NBA) season restart sa Walt Disney World Resort sa Orlando, Florida.
Kini maoy labing unang higayon nga naangkon sa Lakers ang No.1 nga puwesto sa West gikan niadtong 2010.
Sa kinatibuk-an, kini maoy ika-17 nga higayon nga nasakmit sa Lakers ang No.1 seed sa West apan usa sab ka dekada ang ilang gihuwat una kini nila nakuha og balik.
Mao sab kini ang labing unang higayon nga nakabalik pagsulod sa playoffs ang Lakers gikan niadtong 2013.
Nagbangis si Anthony Davis ug nagpakatap kini’g 42 puntos ug 12 rebounds aron pangulohan ang Lakers, nga ningsaka sa 51-15 nga rekord.
“If you’re winning enough games to secure the No. 1 seed, you’re building the right habits that are going to be necessary for you to win in the playoffs,” matod ni Lakers coach Frank Vogel.
“Obviously we have bigger aspirations than the No. 1 seed, but we are proud of the accomplishment and we’ll enjoy it while we’re getting ready to get our group ready for the playoffs.”
Nakakompleto og talagsaong four-point play si Davis aron hatagan ang Lakers og 114-102 nga labaw sa nahabiling 42 segundos.
Gitubag kini ni Jazz All-Star guard Donovan Mitchell og kaugalingon niyang four-point play nga nakapahak sa labaw sa Lakers, 114-106, sa nahabiling 36 ka mga segundos.
Apan wala na nakaduol ang Jazz hangtod na sa pagkapupos sa oras.
Niamot og 22 puntos si LeBron James alang sa Lakers, niamot og 11 puntos si Dwight Howard samtang nidugang og 10 puntos si Kentavious Caldwell-Pope.
Ang Jazz, nga kasamtangang nagpatong sa ikalimang dapit sa West dala ang 42-25 nga rekord, gipangulohan ni Mitchell pinaagi sa iyang 33 puntos, nihatag og 24 puntos si Mike Conley samtang nidugang og 16 puntos si Rudy Gobert.
Si Davis, kinsa igo lang nimugna og 14 puntos sa 92107 nga kapildihan sa Lakers miagi nilang duwa batok sa defending champion Toronto Raptors, sayong nanginit ning kombatiha ug nakamugna dayon kini’g 20 puntos sa halftime pa lang.
Kini maoy ika-20 nga higayon ning maong season nga nakamugna na og 20 puntos o mas labaw pa sa halftime pa lang.
“Coach just told me to be more aggressive,” asoy ni Davis. “He felt like, and I felt like too, that I just kind of played into Toronto’s defense, accepted the double-team. I was making the right plays, but I still have to be aggressive at the same time.”
Igo lang naglabaw og duha ka mga puntos ang Lakers sa halftime, 58-56, apan pagsugod sa 3rd quarter, hinayhinay silang mibiya hangtod nga nakontrolado na nila ang kombati.