Kinahanglan silutan

Gitay-og og maayo ang Philhealth sa kontrobersiya taliwa sa giatubang nga health crisis karon sa nasod nga mao ang coronavirus pandemic. Unang kontrobersiya mitumaw sa imbestigasyon mao ang giingong pagkawat sa P15 bilyunes nga pundo sa mao nga ahensya sa kagamhanan nga gitahasan sa pagsuporta sa pinansyal nga panginahanglan sa panglawas sa mga Pilipinhon.

Ikaduhang mitumaw sa imbestigasyon mao nga kon magpadayon ang Covid sa pag-atake sa nasod sunod tuig, ang pundo kutob ra sab sunod tuig.

Maka-shock, di ba? Mag-unsa na lang ang mga Pinoy nga nagsalig sa Philhealth kon mabangkaruta? Kon mabangkaruta, mas dakong rason ang kurapsyon, di sa pagkaospital sa mga sakop nga nasakit og coronavirus disease.

Kinahanglan ilusad ang lawom nga imbestigasyon sa anti-graft commission aron mahunong na ang mga binuang. Imbestigahon og lawom aron masuta kon unsa ang mga binuang sa sulod, unsa ka dako ang danyos ug kinsa ang nangu ug nangalambigit.

Di tiaw ang P15 bilyunes kon tinuod man nga gikawkaw sa mga kukhang “mafia.” Kinsa ang mga nagpasiugda kinahanglan nga mataral sa hukmanan. Kon mapasar na nianang higayuna ang death penaly ug ilakip sa silot sa kamatayon ang graft and corruption, angay nga silutan ang mga opisyal nga nakahimo niini.

Nganong angay mang silutan og kamatayon? Kay minilyon ka mga Pinoy, gikan sa labing kabos nga gipamiyembro sa mga local government unit, ngadto sa mga trabahante, kinsang suweldo gikaltasan sa Philhealth, nagsalig sa pinansyal nga abag sa medical nga panginahanglan.

Kada miyembro nagkinahanglan kaayo sa suporta sa Philhealth. Apan karon nga padung diay mabangkaruta, asa na man lang dangop ang kabus nga mga miyembro kon maospital? Mamatay na lang kay way modawat nga ospital kay wa nay Philhealth. Kadako sa ilang mugna nga perdisyon sa kinabuhi.